KATIMA MULILO – Likolo la Zwelopili ya Libaka za Litolopo ni Matakanyani lisulile masheleñi alikana bolule ba mwanda (N$100 million), kufa katengo katolopo ya Katima Mulilo kuli kaise lisebelezo za mulilo wa magesi ni mezi kwa makomponi abalwa ana ikahela. 

Likwambuyu wa Likolo James Sankwasa nazibahalize kanako ya mukopano wa kuikambota Labubeli. Naize makomponi ana ikahela aka fumana lisebelezo zeo ki Nova, Macaravani ya Wiko, ni komponi ya Dairy. Muyahi naitekezwi kuketwa Labutanu. 

Katengo ka Munzi wa Bukalo nikona nekafumani musulo olikana bolule bamashumi amalalu kabaketalizoho (N$35 million) hala lisebelezo zeswana, kungelela cwalo ni mezi, mulilo wa magesi, lisebelezo za limbuzi, makete ni mikwakwa. “Haiba kuna ni ya bulela kuli hakuna mezi ni mulilo wa magesi, zeo seli matangu. Mali alikana bolule ba mwanda afitile,” nekubulezi Sankwasa. 

Nasusuelize bayahi kuswalisana, sihulu bao ba bana ni kushimbuluka kuli zwelopili iezahale, nahatelezi kuli ao kimakalelo feela akutahisa zwelopili mwa tolopo ni sikiliti. Likwambuyu nasebelisize kolo yeo kupatulula kuli piho ya kutatuba kamaiso ya katengo katolopo ya Katima Mulilo, kasamulaho akulundulwa kwa bayemeli batolopo nefumani litaba za kutula mulao, bulyangelino, ni kamaiso ya mbwashula. 

Piho ibonisa kuli lipisinisi zeñwi nelisa lifeli lisebelezo za mezi ni mulilo wa magesi, lipeleko zeñwi nelifiwa isi kaswanelo, mi kampani ya RedForce ye Koleka Likoloti nesina tumelelano ye nyatezwi ni katengo katolopo ya Katima Mulilo. 

“Cwale mukona kuni bulelela kuli neni swanela kuina feela kakuba likwambuyu, ni kusiya katengo katolopo kuli kazwelepili?” abuza. Kiha fa mamela kuli nihaiba bayemeli bakatengo katolopo ba ba taha nibona baka ipumana mwa mayemo aswana haiba inge basa zamaisi hande lika. Zeo halili cwalo bayahi batolopo neba kupa kuli piho ikabelwe ni sicaba nikuli kampani ya RedForce ingelwe muhato. 

Sibuabui Yomuhulu wa Katengo Katolopo Chrispin Muyoba, nabulelezi Nampa kuli piho kakutala haikonwi kuikabelwa ni sicaba. Naize kuna ni lika zesa swaneli kuzwa kwande, nikuli kueza cwalo kukaswana kwafofaza lipatisiso ze zwelapili. –Nampa