ǀAEǁGAMS – Ministeris ǂUrusib tsî ǀHûhâsi !Oabadi dis (MoHSS) ge Katuturas ǂUrusib Senters sîsenǁaeba 24 irga tsēs !nâ nî ǁkhowa-amsa !oabade mās !aromase nî khoraǂui. Nē kliniks ge !Norasasib !Ganni tsî Clemens Kapuuo !ganni hâkha di ǁhôas !nâ, Black Chain ǁamaǂharugu!khaib tawa mâ. Nēsis kōses ge nē kliniksa ǁgoagas 7 ir ǁaeb ai ǀhui-am tsî !uis di 7 ir ǁaeb ai ra ǂganam. Noxopan nausa mâ tsēs asa mîǁgui tama hâ, xaweb ge MoHSS di Sîsenǂui ra Direkteri Ben Nangombeba ge ǁawoǁawo, ǁîn ǀgūǁae ǁnāti ī ǂhaitsi ǂanǂansa ǀhûhâsib khoen !aroma nî ūhâsa nē kliniks di daodi nî 24 irga tsēs !nâ sîsenxas disa. “Sida ge ǀnai sîsenaona ǂhomisase ūhâ hîa ǀae!khōs mâisan, soǀôan ǂansaben tsî noxopa nau nî ǂhâbasa !oabadi !aromas tsîna, xawe i ge ǀnai ta go mî hâ ise ǀhûhâsiba !goaxa wekhegu !nâ nî ǂanǂanhe mâǁaes nē !khaisa nî ǂnāǁnâsa,” tib ge Nangombeba ge mî. Ai!âb ge ǁîba a mîs ge, nē ǂâiǀgaub nî sîsenxa !khaisa !âitsâs asen ge ge dītsâ nē kliniks tawa khoraǂuisa irga !uis 7 irs khao!gâ ǀarosa. “Nēsis kōse i ge !gâise ra sîsenǂui. ǀGui !oe ta ge nē kliniksa ge sari tsî mû ta ge sa !oa di ge !oabade kaise !gâise ra ai!gû,” tib ge New Erab ǂhôare-ao-i ǀkha ge ǁawoǁawo. Nē klinks di khoraǂuisa sîsenǁaegu xōǀkhāb ge ǂUrusib Ministeri Dr Kalumbi Shangulaba, noxopa !nona klinikde Kavangob Aiǂoas tsî Huriǂoas ǀkharikha !nâ nē wekheb !nâ ǂhanusise nî ǀhui-am. ǁÎdi ge Shidikongoros, Dcwatjingas tsî Ncaute ǂurusib klinikde. Nangombeb ra mîsa !oa di ge nē klinikde ǀnai ǀhûhâsigu !nâ ǂurusib !oabade gere mā, xawe ǂkhariros ǀguisa ge ī i, ǀguisa xu ǀgam !nā-omra ǀguira ūhâse. “Klinikdi ge ǂkhariro tsî ǀoros tsîna ge ī i, xawe nēsi !gâi!gâi!nâhe tsî khoraǂuihes tsîna ge dī î di ǂauna khoena !kharaga ǂurusib !oabade mā. Nēs ge ministeris di ǁgūbasa, ǀhûhâsiga !oa ǂhâbasa ǂurusib !oabade sī-ūsa, in tā ǀhûhâsigu ǀae-aona kaise !nūse nî !oabade ôase ī,” tib ge ge mî.