WINDHOEK- Egano eli gatulirepo Presidente gwaDTA McHenry Venaani asi vamupe evango asi mukurona gwawo mokumufumadeka ogu gavaruganena nawa. Katuutire Kaura ngesi kuna kumoneka asi egano eli hambara vaturepo ngesi kuna kara tupu nye vana lipungura kapi lina kumoneka asi naliza moyirugana. Venaani yige gatulirepo egano eli posiruwo sepongo lyawo lyakahurako konyara nomvhura mbali dina kukapita. Venaani kwayiuyungire eyi konyima tupu apa kafundire Kaura momarumbasano gevango lyouPresidente wombunga zawo zaDTA. Apa kauyungire kosayitunga zaNew Era, sinkwa ntani kapi kageve uzera nampili nakauke gegano eli gatumbwire siruwo oso vamuhorowere. Egano eli simpe kuna kulilikunda nalikwata siruwo nye natugwana tupu asi yinke nayihoroka. Kuna kuyimona asi yahepa kuliza nodiveta omu natukalirundurura. Nye Venaani kagenderere kulimburura asi kuvhura Kaura kapi nagwana evango eli morwa kutunda tupu apa nawiza nagano lyangesi Kaura kapi ana kara hena asi gumwe ana kara nomukaro gomuwa mumbunga zetu. Ame ngani kagava yitundwamo kombunga zetu zontjimantjima, omu ngava katokora asi kuvhura Kaura agwane evango eli ndi hawe. Nsene asi kapi ngatambura evango eli, hawe napo nawa tupu ose kapi ngatumusininika. Kaura ogu gakara asi presidente gwaDTA, nonyuku murongo, kamonekere asi kapi ana kara noudigu nampili kapi vana mupe evango olyo hawe age kapi nakara noudigu. Ame kuna kumoneka asi nakara nompora mepwizumuko lyange kulihamesera moupolitika, kapi nina kara negano asi yinke nawa nawa nanigwana mo mokukara mevango olyo. Mokukwama mwendi olyo kwakere tupu yokuuyunga kapisi yokuza moyirugana. Owo vana kara moumpitisili yiwo vana kara nononkondo mokutokora kapisi nyame. Ame kapi nina kara nevango nkenye mombunga politika zaDTA. Nsene vana kara nosilika vazigidenge hawe tani wiza nye kapi nakara asi kapi nanipura nsene kapi vana zigidange kapi nina kara nepuro nkenye. Yimo ana kupura ngoso Kaura ogu kahagekere sirugana sendi mombongarero zanavenye kwedi oku kakupwire ngesi mepwizumuko ana kara. Kaura naDTA, mukaro gwawo kapi guna wapa kutunda tupu apa gazumbanesa evango lyendi lyoupresidente wombunga zawo mo 2013. Venaani naKaura kwatokwere asi tavaruganene kumwe nye kapi yina kumoneka asi navaruganena kumwe nampili nakauke. Mvhura zina puko age kwamutjidire moDTA, kumwe nokumugusa evango eli gakere nalyo mombongarero zanavenye apa vamugwene asi Kaura ana kara mepuko. Age kwamugwene asi kapi ana kumona nompitisili dina karamu asi mulyo ntani kwaretere malitondoworo omu yatwarederere mbunga zendi zikare asi kapi zina wapa. Apa nye vamugwene epuko awo yipo vatokwere kumugusamo mombunga zawo asi ngano akare tupu muntu tupu gahana mbunga politika.