■ Otniel Hembapu
WINDHOEK – Omukwati gwosipana yaNamibia yopashigwana yokatanga kokoompadhi Loydt Kazapua okwa li a koleke kutya okwa shaina euvathano nosipana yomoliga yopombanda yaSouth Africa (PSL) yedhina Baroka FC, shika osha hala kutya omunamimvo 30 ota ka waiyimina osipana ndjika yomoPolokwane okuza koMaccabi FC, ndjoka hayi dhana moliga ontiyali moSouth Africa.
Kazapua ngoka a li a fuula aatali yokatanga kokoompadhi sho a li ta keelele omatanga kekopi lyiigwana yaAfrica ndyoka tali dhanenwa moEgypt, okwa li a dhana nawa unene tuu sho konyala Namibia a dhane shi thike pamwe naMorocco nokwa ka dhengwa sho i itula okoola ye mwene ndjoka ya li ya tulwa mo kuItamunua Kaimuine kominute dhahugunina. Okwa li wo oye omukwati sho Namibia a dhengwa kuBafana Bafana.
Baroka oya li ya koleke eshaino lyaKazapua mEtiyali noya li ya shanga komapandja gawo komalungula kutya “Baroka FC oya shaina omukwati gwotango gwaNamibia Loydt Kazapua. Otwe ku taamba ko.” Nonando ongawo ospana inayi gandja uuyelele kutya okontalaka ye oyi na uulethimbo wu thike peni, ashike okwa itaalwa kutya oyoomvula mbali nope na ompito yi ka gwedhelwe uuna ye ya pehulilo shi ikwatelela kutya ota ka dhana ngiini.
Omukwati nguka omukulu gwoAfrican Stars noTigers okwa li a taaguluka oongamba dhomulonga gwaOrange opo a ka dhanene oHighlands Park, hoka a kala okathimbo okafupi manga inaa ka dhanena oMaccabi FC moliha ontiyali yomoshilongo.
Aadhani yalwe ishewe mboka ya mona oosipana oompe omudhani gwokonima gwoBrave Warriors Tiberius Lombard, ngoka a za koLusaka Dynamos a ya koZanaco FC moliga yopombanda yaZambia.
KoLusaka Dynamos, omunamimvo 30 Lombard okwa li ha dhana pamwe naAwilo Stephanus osho wo Petrus Shitembi. Lombard ka li oshitopolwa shaadhani mboka ya kutha ombinga kekopi lyiigwana