Keetmanshoop-mokugusapo udigu wounene tuna kara nawo wokuhamena mambo, ndango zegendeso doropa zaKeetmanshoop kavakere nelikwamo lyokuwapayika evhu omu navatameka kudika mambo gana siki ko 30 kwava ava gwana nonzambi dononsesu kevango lina kara asi ext 7.
Mukurona godoropa McDonald Hanse katente asi elikwamo eli kuna kara nye asi twahepa kuvatera ava vana pili uturo vagwane nye kupitira melikwamo lyaBuild together. ‘’ Eyi kapi yina pumbwa asi ntudi vaava vadidilika nare, vafute nsonso ezi avatumbura asi deposito nye ndando nazinye kuna kara asi yimaliwa yokusika koN$80 000 yina kara asi yiyo yimaliwa ngafuta ogo ana gwana embo momakwedi kukwama omu vanayilizuvhu. Age katwikilire kuhuyuynga asi nsene asi vanagwana N$2 zonomiliyuna, ezi nye nazigwana ndango zodoropa, kutunda koministeli zonodoropa nekuliko nomukunda mosiruwo esi seyereko yimaliwa yomvhura ezi, vakansela kuna kukagazara vakadike mambo gomanzi. ‘’ Mokutara nye epiro yirugana yinazeruka ngesi modoropa zetu, ose katutokwere asi twahepa kuruganesa ava vadiva kutunga vakara modoropa zetu vadike mambo aga,’’ yimo ana kugwedako. Age kagwedereko asi vakansela kuna kara nehuguvaro mosirugana sawo esi, omu navagusapo udigu womambo, una sikama ngesi po 4 000 nampili ngomu tuna kara asi kolili ekuliko lina kuwiza modoropa, yimo hena tuna kumona vantu wovanzi kuna kudukira kodoropa.
Age simpe kageve ehuguvaro asi mambo aga naga pwa kugadika komeho zikapwe mvhura ezi. Apa nye kavamupulire asi ezuvake nye owo vana gwana mambo aga ngava gwana nonzapo dawo dokulikida asi embo lyendi unene nampili vava vagwene mambo mvhura zina puko, napa tuna kuhuyunga ngesi vakuyirugana vana kasika nare ko Fonteintjie, ntani nsene vana mana vakansela makura tavagava nombapira dawo edi tuna kumbura asi PTO kowo vana kara asi yiwo vana gwana mambo ogo.
Apa nye kavamupuragerere wosayitunga zaNew Era, Michael Humphries, mwenya JMH Trading enteprises, ogu nye gagwana yirugana nye eyi yetungo yomambo gavali, katente asi ngesi mokumana ana karere, age katente asi mpito zangesi nazininkisa kampani zendi zikure. “ Ose tuna hafa morwa ndango zodoropa zina tutarako nose, tuna kara asi nokampani gona morwa marumbasano gokugwana yirugana eyi udigu unene, unene nsene kuna kurumbasana nonokampani dononene, omu vakara asi vakara noudivi ntani vana kara noyimailiwa yohepero, yimo ana kugwedako. Humphries simpe katwikilire: “ Ame ninagava yirugana kovantu vane vapira kukara noyidivi koyirugana eyi, ntani vavali vadiva nye kutunga, ano nsene asi natumana ogo mambo gavali ago hena vagahafere, ose kuvhura tugwane yirugana yetungo yoyinzi omu natutunga mambo gomanzi konyima.