Xrat 10 di skolǀgôab, Kaiǀaub dib ge hāǀaro ra ǁkhāǁkhāsens ǁgau!nâde ǁîb kurisa skolǀgôana gere mā, ǀgui timî tsî gu ge skolga daode a ǂganam Covid-19 !aroma xawe. Nausan xrat 11 tsî 12 skolǀgôana skolgu ǁga ge a oa, xawen ge xrat 10 ǀgôana ǁgau!nâs ministeris ǀaweǁguib !oa, ǂKhoesaob !nâ ǀgui skolgu ǁga nî ǁaru !oa!ū hâ ǁkhāǁkhās !aroma. Nē mâsib ge 16 kurixa Ridge ǂKheimseba ge ǁari îb, ǁîb kurisa skolǀgôana !kharaga ǁkhāǁkhā!âgu !nâ ǁkhāǁkhās hui!nâde mario!nâse mā. ǂKheimseb hîa Grootfontein Sekondere Skoli tawa ra ǂgâb ge în ǁgâus tawa nē ǁkhāǁkhāsa ra dī, tsîb ge mîb rasa !oa Covid-19 ǁgaragu aiǁgause ǂgaoǀkhāsa !nūsiba ǀnâuǀnams khami in ai ra dīǀoaǀoa. ǁÎb ge nē ǁkhāǁkhās hui!nâdi ǀkha ǀnai Covid-19 khoraǂuis ai!â ge tsoatsoa, ǁîb kurisan mâti ǀnî ǁkhāǁkhā!âgu !nâ !gomma gere tsâ !khaisab ge a mû o. “ǁGau!nâ-aosis turab ge tita !nâ ǀnai ǀgôarose da gere ǀhuru ǁaeb !nâ ge tsoatsoa, ǁnā !âs ǁgau!nâ-aosis ǀguisa ta tita gere ǀhuru ǂgaose, tsîs ge nēsa kaikhâi ta ra kham ti ǀgamǁî sîsenni ase ge hā, ǁnāpa ta skoli khao!gâ ǁnān hîa !gomsina ūhâna gere hui!nâse,” tib ge gere mîba nē ǂhôare-aoba. ǂKheimseb ge mûb ra mâtin ǁîb kurisa skolǀgôana nē ǁkhāǁkhāde xu ra domdore !khaisa amaga nē !gâi dba ǀû ǂgao tama hâ, xaweb ge mîb rasa !oa !nubusib xoa-ūxūn tsî xoa-aixūn tsî ǂnûi!naon tsî tāgu diba ūhâ tsî nēs ǀkha huiba ǀhûhâsib khoen ai ra ǂgan mâxōǀkhāhesa. “Tita ge !gaoǁgui ǁgau!nâsa xu xrat 9 ǀgôan tsîna ra hui, xaweb ge !khaiba a ǂkhariro. Kaise ta ge ǁnā ǂkhawusa ǀgôan hîa ǁkhāsiba ūhâ tama hâna ra hui!nâ ǂgao, xawe ta ge ǁgoaǂuidi xa ra !hâumâihe,” tib ge gere mî. Kaiǀaub !nâ ti huiba nî ǂhâba skolǀgôan ge a ǁkhoreǁharesa hāsa. Nēsib ge ǁîba xrat 10 ǀgôana ǀgaisase ra hui!nâ, !kharaga ǁkhāǁkhā!âgu !nâ. ǂKheimseb hîa Makalani ǂAm Skoli tawa ge tsoatsoab ge mamasas tsî !nona aisan ǀkha Kaiǀaub !nâ ǁan hâ tsî ra ǁkhāǁkhāǂuisa ǁgau!nâ-ao kai ǂgao.