Steven Klukowskib
Dītsâdi hîas ǁKharas ǀKharisi ǀAwemā!nansa ra dīdi îs Aimûǀgarus 2030 di ǀaweǁguiga ǀoasase dīǂuise, xaweb ge, ǂkhari-omn mâsiba nēsib īsa !oa 2030ǁî kurib mûǂuiba ǀoasase sîsenǂuisa ra !hâumâi. Nēs ai mûba mâi hâses ge ǀkharisi ǀawemā!nans berosa ǀasa ǂkhari-omde ǀAus tsî Aroab ai oms di !hūkhôasa ge ūhâ i. ǁNā !hōkhôas ǁaxasib Aroab dib tawab gere !hoa soab aib ge ǂNūǂgoaes !garo!ā ǁhûi!nâǂharis ǀawemā-aob Elias !Kharugaba gere ǁgui!ā, ǂgurb ge ūhâ i ǀaweǁguib !oagun !gamse ra āga khaohe ǂkhari-omde aibe ǁnān hîa ǂkhari-omna ūhâ taman !aroma gere mā ǂgaosa, xawes ge ǁîb berosa ǂgaeǁnāhe ra ǂkhari-omdi ai ǀams ai a mîǁguisa. “Aroab ǁanǂgāsaben khoesisa omkhâis !aroma ta ge ti beros !nâ-ū ǁKharas ǀkharisi !âb !Garo!ā !Oabadi mariǂnûiǂuisa xu disi ǂkhari-omde nēpa nî omhe,” tib ge ge mî. ǀNai di ge ǀgui kaidisi ǂkhari-omde Aroab !nâ 2016 xu 2017 kōse ge omhe tsî 240 ǂkhari-omde ge ǀaweǁguihe hâ i 2019 kurib !nâ ǀKhoes ǁanǂgāsaben !aroma, nēs ge Harambee ǀOmkhâis ǀAweǁguib !nâ ge isa, xawe i ge nēsis kōse 80 persentgu projekn ǀguina ge dītoahe. !Kharugab ge ǁanǂgāsabena gere ǂgaoǂgao!nâ in ǀhonkhoesisa nētib ǂhanuba mario!nâse ra dība ni ǂkhari-omn tsî ǀnî hâ xūn !aroma ū tsî khôaǁnâsa xu ǂgōsen. Jan Scholtzi, !Namiǂnûs ǁhûi!nâǂharis ǀawemā-aob ge ǀAus di !hūkhôas ǁaxasib tawa ge mî, kaise i nēsi a ǂhâbasa !khaisa, Covid-19 ǁōs khoraǂuisensa ǁkhaubas !nân ǁanǂgāsabena ǂâuǀoa hâ ǂkhari-omna nî ūhâsa, in nēs !nâ-ū ǂgaoǀkhāsa !omǁāsa ǀoasase mâ ǂkhari-om sîsenūs hoas khao!gâs tsîna dī ǁkhā. ǁKhātib ge ǀawemā-aoba nē ǁaxasib tawa ge !gāsa kai ǀnain ge ǀnî ǁanǂgāsaben ǀAus dina, Harambee ǀOmkhâis ǀAweǁguib !nâ 154 ǂgaeǁnâhe ra ǂkhari-omde 2017 xu 2018 kōse a !khō!oasa. Aiǂnû-aob Shikongob ge ge mî, ǂgaoǀkhāsa !harib ai hâ ǂkhari-omde ǁanǂgāsabena mās ǂhanub xa marisise ra mâ!gâhe tsî ai!gû ra projeks ase hâsa.