Khorixas
Khorixas ǀawa!namn danab, Hiskia Nuuyomab ge ǁnāti ī ǁamaxu!khaigu hîa ǂkhamǀgôan ai xûina ra ǁamaxuga ge ǂgan is nē !khaisa ǀûhe. Nuuyomab ge ge mî “ ǂGansa da g era dī ā!khaidi !nâ ra ǁamaxu khoen tsî ǀhonkhoena !oa in ǂkhāsen nēsa dīsa tsî ǀoasa sîsenǁareba mā ǀawa!namna tsî skolǂgâ ra ǀgôan ga ǁîn ǁamaxu!khaigu !nâ nî ǂgâs karao ǂhâbasa dā!harode ū nēsa ǀariǂuis !aroma.” !Aruǀîb ge Nuuyomaba skolgu ǂgaeǂguidi tsî ǁgûna gere ǂgan in ǀawa!namn ǀkha sîsenǁare nē mâsiba oresa hōbas !aroma. ǀNî skolgu tsî hosteldi ǁgâuǂnamigu ge āde ūhâ nē skolǀgôan ǁnāpa-ū duniǂoa tsî ra ǂnā ka ā!gûde. Nuuyomab ge ǁnā-amaga ǂgaeǂguidi ai ǂgansa ra dī nē āde ǂganam tsî ǁawoǁawosa ǀgôan ǂganaga nî hâsa. ǁÎb gere mîsa !oas ge ǂkhamǀgôan Khorixas !nâ hân ǁaegu ǂauxûiba sîsenūsa kaise a ǀgapi. ǀAwa!namn !aroma i ge ǂkhamǀgôana ā!khaiga xu ūbēsa supu tama hâ hoa ǁaen skolsaran !nâ hâ tama amaga. Nuuyomab gen au ǀkhāb ai koasa Sunrise Hotels ǀhonkhoeb, Elfie Esauba ge mā, ǁîb kurin !naka hâ ǀgôana ǁîb !khaib tawa ǂgâsa mā-am tama !khais !aroma. “ǀGuis khami ī ǀgôa-i tsînats ge nē ā!khaib tawa mû tama hâ. Nau ǂharugu-aon tsîna ta ge ra ǁgoaǂui nē îxa aiǁgausa saosa,” tib ge ge mî. ǁKhātib ge ǁgau!nâ-aogu hîa skolǀgôan ǀkha ǂauxûiba ra ā gu ais tsîna ge ǂgan î gu nē tsū ǁnaetiba ǀû. “Mâtits ǁgau!nâ-aose ǀgôana xu !gôasiba ra !âubasen ǁîn ǀkhats ga ǀguipa a āo,” tib ge gere dî. New Erab ǂhôare-ao-i ge ǂgui !gôab skolǀgôana dana !ganni !nâ mâ ā!khaigu tawa Nampost ǀgūse gere mû. Nēs aib ge Cornelius Goreseb ǀGapi Skoli di skoldanab, Ndjizuzwe Haakuriba ge mî, ā!khaigu hîa skolgu ǂnamipeb!nâ mā gu nî ǂganamhesa. New Erab ge ge ǂanǂanhe, Cornelius Goreseb ǀGapi Skoli ge !gâi!gâisens ǁaxasin hoana ǁîn skoli twa ge ūbē nēs ǀgôana āsa a ǂgaoǂgao!nâ ǁkhā xui-ao. Haakuriab ge ge mî, ǂAuxûib ǂHanumās !gāsase ra mîsa 18 kurin tsî ǀgapise hâ ǀgôan ǀguin a mā-amsa !khaisa ā!khain tawa sīsa.