Khorixas
Khorixas, Kunene ǀKharib !nâ ǁgoes tsî ǁaupexa 10 000 ǁanǂgāsabena ūhâs ge ra ôa-am mâtis ga !narisarimas tsî !hū-omkhâis ǁkhāsib hîan ūhâba sîsenūs !nâ-ū !āsa a omkhâihesa. Khorixasa ǁgoaǂuise īban ge kaise ǀorosib !nâ hâ ǀhûhâsi tsî ǂharugu-aon ǀkha hâ !hûǁaredi, kaise ǂkhawusa sâuǁkhāsib, marisihuiba hōs !nubusib, !nubusib ǂans tsî ǁkhāsigu dis ǁanǂgāsaben !nâ, !nubusib ǁîn ai ra kō!awa-aihe khoen dib, !hao!nāsi ǂūsigu di !nôa-ai!naose īs tsî aitsama ǂgaoǂgao!nâsens !nubusib hâna.
Nēn ge ǀnîn hîa ge ǂoago wekheb ai ge ǁîs a ǂguro !nās ase nē !ās tsî ǀkharib !nâ ūhe hâ i ǁguiri-aon konferensis tawa a ǂoaxana.
Khorixas di sâuǁkhāsiba ǀomkhâi kais !aroma a ǂhâbasa !khais ge ǁguiri !ēde ǀhui-am tsî sîsenga ǂnuwibasa ǁanǂgāsabena. Nē ǂâiǀgaub tsî ǁkhoreba ai!gûbas ases ge ǁîs a ǂguro !nās ase Khorixas !Ā!nāsi Omkhâis ǀHûsa ge ūhâhe hâ i.
Nē ǀhaos ge “Tsoatsoa ǀOmkhâisa ǁGâus tawa Sâuǁkhāsib ǀOmkhâis !Nâ” ti gere mî ǂgaiǂams !naka ge hâ i.
Nēpa ge ǀhao hâ in ge ǀhûhâsib khoen tsî Khorixas !nâ ǂharuguna ūhâ khoena. Aimâba-aob, !Ā!nāsi Omkhâis ǀHûs dib, !gôahesa Bisey ǀUirab, ǁîb tsîn ǁkhāti a Khorixas !naesabeb ge ge mî, nē ǀhûs di ǁgūbas īǁkhāsigu ǁguiri-aona Khorixas ǁga ǂgaes, sîsenga ǁanǂgāsabena ǂnuwibas tsî !ās sâuǁkhāsiba omkhâis ai !ammâisasa.
ǀUirab ge mîs ge, nē !ās ǂhâba hâ xūn di ǀgui-i ǂnuwi tsî ǀgaiǀgais !ā!nāsi sâuǁkhāsibas, ǁguiride Khorixas !nâ hā dīs !aroma ǁguiri-aona nî ǂgae ǁaxasina ūhâs.
Nēs ǀkha nî !gûǀhaose sâsâ ǂharugu ǂnamipeba ǂnuwis ǂharugu omkhâis ase, ǂgomǂgomsa tsî tani!kharuhe ǁkhā ǂharugu!nâ!khain tsî ǂgaoǀkhāsa ǂans tsî ǁkhāsiga ūhâ sîsenaona. “Sida ge sida ǂkham khoena ra ǁkhoreba in ǂharugutsoatsoa-ao tsî ǂgaeǂgui-ao kai ǁaris !aroma.
ǁNā-amaga î ge a ǂhâbasa gaxu ǁaeb ai !ammâisa omkhâisens sîsenǀgauga da nî ǀaweǁguisa, Khorixas ǀguis di omkhâisens ǁgūbadi oses ase xawe hoa !hūb !aroma,” tib ge ge mî. Nēb ge khao!hūb nē ǀhaos ǂâibasens di ge ība.
ǀUirab ge !aruǀî ǂkham khoena ge ǂgan in aitsama ǂharugutsoatsoas !ēde ǂnuwibasen Khorixas tsî Kunene ǀKharib di omkhâis !aroma. ǀUirab ge gangansa Khorixas !ā!khōmais tsî ǁîs di !âǀhuru-aona ge mā, īǁkhāsiban ge dī tsîs ge nē ǀhaosa a hâsa, ǁîs !nân mâtin sâuǁkhāsiba ǁkhawa a omkhâi ǁkhāsa gere ǀawemāguse.