ǀAEǁGAMS – Sîsenǂui ra direkteri ǂGuro Ministers Beros !nâb I-Ben Natangwe Nashandib ge ra mî, ǂhanub ǀkhamasa tsî ǁawosa sîsenǀgauga ǂgaekhâi hâsa, îb ǁawoǁawo nē proxrammi hîa ǀkhurub huib !aroma hâb hîǀhuruhe tidesa ǁkhaes ase. Nēs ge !gōsase ǁnā ǂûn tsî nau hâ huisenxūn hîa nē ǁaeb !nâ ra ǀkhaehen ǀguiǀguibe khoen !omgu !nâ ǁnā tidesa. Nashandib ge New Erab ǀkhab ge ūhâ i dî!nâǁgamǁare-i !nâ ge mî, ǂhanub ge kaise !gāsa ǂgaoǀkhādi tsî daoǁgauga a ǂgaekhâisa ǀkhurub huib mâxōǀkhāsa nî !khō!oa khoen hîa ǀkharigu !nâ nî ǁgaumâihen ǂnamipe. Nē nî ǁgaumâihe khoena xus tsîna ra ǂgaoǀkhāhe !khais ge ǀnîkhami ī ǂkhaninan ǁîn ǂgamamsendi ǀkha nî māǂgāsa. ǂGuro Ministers Saara Kuugongelwa-Amadhilas ge ǂoago ǁkhâb !nâ !Haosi ǂNûsa ge mîba, ǂhanub nēsis kōse N$40 miljunsa ǁîb di ǀkhurub huib proxramma xu sîsenū hâsa. ǂGuro Ministers ge dîdi hîa ge mâ!oa ra ǂgiǂgo !nanra mâisara, Jennifer van den Heevers, Popular Demcratic Movements dis tsî Madala Nauyomab All People’s Partys dib hâra xu hâ ides gere !eream soab ai sao rase gere ǁgui!ā. Nē N$40 miljunsa xub ge ǂhanuba ǁaupexa N$30.5 miljunsa ǀkharisi ǂgiǂgosi ǀawemā!nandi !oa ge ǂhā!haru, ǁgam-i mâsiga oe-ams ase, !gōsase ǁgamamde !gâi!gâi!nâs tsî ǂhâbasa a ǁgam-i ǂnamipe xūna kō!gâs ase. Noxopa ge nē N$40 miljunsa xu a sîsenūhes ge N$4.83 miljuns hîa ge ǂûna a ǁama-ūhesa Gamaǀaeba xu Aǁkhumuǁkhâb kōse nî !khoena. N$1,26 miljuns ge !narixūn tsî !naris !nâ nî hâ mâxōǀkhādi !aroma ge māǂuihe tsî N$3.35 miljunsa ûitsamaxūn di luserna ǁamas !aroma. ǁÎb ge ai!â ge mî, hoa māǂuidi hîa ge nē marisa xu a dīhedi ge xoaǁguisa ǁgaragu ǀHûhâsib Māǂuidi ǂHanumās, 2015ǁî kurib dis !naka a dīhesa. AI!âb ge ge ǂanǂan, mai-i nî kuru-ūhe milin hîa ge Agro-Marketing Trading Agencysa (Amta) xu a ǁamahen !norasase ǁîn sâu!khaib !nâ a sâusasa. ǂGuro Ministers Beros ge ǁnāti ī !oabasa nî mā ǂnûiǂgās nē milin nî ǁnaruhe tsî mai-e kuruhe tsî sîǂuihesa ra ǂgao. Nashandib ge ge mî, ǀkhurub huib !aroman 3 500 ǂgari-aona a xoamâihesa tsîn 2 000 ǂgari-aona ǂguro !âb nē proxrammi diba xu nî domdoresa.