Aron Mushaukwa
Katima Mulilo-Katengo Katolopo ya Katima Mulilo kakutiselize famusebezi yoneli sibuabui wakona, Chrispin Muyoba, kukala la 19 Yenda, kasamulaho akufiwa taelo yeo ki Khuta yaliswanelo zabatu.
Muyoba nazusizwe famusebezi mwa kweli ya Yowa 2014, kasamulaho wakumbalamba kwa silikani sahae niyo neli Muzamaisi wa Katengo Katolopo Charles Nawa, ni kamaiso yakatengo katolopo kasibili.
Pili asikasiswa musebezi, Muyoba nalilimanisizwe famusebezi habeli mwa silimo sa 2013. Kasamulaho kulilimaniswa kwahae sekufeli, Muyoba nalemusizwe kuli situlo sa hae nese sifelisizwe, mi nesicincizwe kuba sa bubuleli ni zamisika. Kulumelwa kuli Muyoba nafilwe situlo sesiñwi kanako yani, kono nahanile, kakuli nabona kuli kalulo yeo neli yamukutiseza mwamulaho.
“Nebabata kuli niamuhele situlo sa mutusi kusibuabui, situlo sene isi fela mwata’sa situlo saka sapili, kono ki situlo, sesilisiyo,” Muyoba ukile abulela kanako yani.
Kusa utwana ko nekutisize kuli Muyoba asiswe musebezi. Nihakulicwalo kasamulaho wa lilimo zefitelela zetalu zamizeko, Muyoba natuzi ndwa yahe yamuzeko ni Katengo Katolopo ya Katima Mulilo mwa Khuta yebona zaliswanelo zabatu, mi Khuta nelaezi katengo katolopo kuli kamukutiseze famusebezi.
Kakuya ka Khuta ya Liswanelo zabatu, kuzusiwa musebezi kwa hae “nekusika zamaiswa kanzila yelukela mi hape neli kwa sialuluti.”
Taelo yezwa kwa Khuta ya Liswanelo zabatu yebonwi ki ba New Era ibaleha sina cwana: “Yazekiswa ufiwa taelo yakukutiseza Muyoba Chrispin Muyoba fasitulo sana swanela kuba nisona kabe nasika zusiwa musebezi mwa nzila yefosahezi, la 4 Yowa 2014. Yazekiswa ufiwa taelo yakumulifa masheleñi akwamulaho kanako kaufela yana inzi azusizwe musebezi ili (4 Yowa 2014 kuisa 30 Muimunene 2017).
Nihakulicwalo, nekusina taelo yakuli Muyoba uswanela kulifwa masheleñi akuma kai. Muzamaisi wa Katengo Katolopo ya Katima Mulilo Raphael Liswaniso natiselize kuli Muyoba use akutezi famusezi kwa katengo katolopo.