Ministera goukanguki nondjewandjewa dokotora Richard Kamwi karugene yirugana yoyiwa apa kakapatwilire sipangerogona nokukapaturutra kiro zokutura vafe vetu komeho vakavavhumbike eyi kayihorokerere momukunda gwaKavango,posiruwo sooso yipo hena katulire elikwamo lyokundokesera mokukandanapo uvera womukongo paveta. Ministera kakere nelikwamo lina kwata moyitji morwa age kakazegwilire sipangero gona esi vatunga sinkwa ntani koBagani momukunda horowero gwaMukwe moutatu,yiyo katwikilire aka zegurure yiruganeso youkanguki paveta koBaramasoni momukunda horowero gwaMashare moune. Ano moutano simpe tatwikire aze koMpungu oku kwakara asi mukunda horowero nagunye yimo ava gutumbura. Ano koMpungu kakakere muuyungi gomunene posilika sokukazegurura kira zosipangero sokoMpungu. Posilika nye esi sokoBagani konyara 200 KM,koupumezuva waRundu age kapandwire wosipangero sakatolika esi sakara momukunda gwina koyirugana yawo yoyiwa eyi ava rugana mokuvatera vantu ava vatunga momukunda,kutunda komeho napa tupu sina manguruka sirongo. Age katente asi ngovarugani ava avarunanene mononzugo edi dina kara asi kuvhura kugwa nkenye siruwo,yiponye asi uministeli ou wakara asi yiwo yatumbukira yoyipangero vahepa kuwapayika mararo govarugani nononkondwa dokuhakwira. Kamwi kakere ana hafa morwa yirugana eyi varugana vatungi novagendesi etungo eli lyosipangerogona pomukunda gwaBagani sina kara asi kwasitunga morupe roruwa. Sipangerogona esi kwasitungisa konyara nomiliyuna N$1.5 ,moyo yimaliwa oyo yoku sika ko N$46000 kwatunga ndi kwayiruganesa mokukwama yihepwa yosipangero ntani mokupopera mukeke gahagwana mukisi kozina,ntani ekonakono noyirugana yimwe yawapera kugwana uhaku posipangerogona. Age kahundilire vatungi pomukunda asi vatare sipangero esi asi sawo nokutakamesa asi vahatezagura yiruganeso yapo. Yomulyo po mwahepa kuruganena kumwe novarugani ava ava rugana posipangero apa, apa kara malizuvho yipo hena apa kara efumadeko nsene namuvenye muhamenamo hawe nkenye udigu ngano kutjatjuka. Age simpe katanterere varugani mosipangero asi vahepa kurugana unene mokuvatera vaveli awo hena vavatambure nawa nsene kuna kuwiza vapapare mbatero. Kwato ogu ngava tengwida kembo asi morwa kapi ana futu. Sipangero gona simwe kava kasizegwilire koBaramasoni sitambo sooso asi kuna hara kuwapukurura uhaku moKavango. Simpe katente asi vana hara kuwapayika mavango gokukara vakadi nsene asi kuna kuhara kuhampuruka. Mokukwamanye veta zope zomarovhu ezi vanakuturapo nosipangero esi kavatungisire koyimaliwa yina siki ko nomiliyuna N$2.1,ano ezi N$46000 ngavaruganesako mokudeura vantu womukunda yokuhamena mukisi gokutunda komarovhu. Sihonena name nina mono asi koveli vetu vakara nonongesefa dahana nombapira pulisiro. Yirugana eyi kavarugene vaporosi vaNamibia vahepa kuyivapandwira. Yiruganeso yikorwesa kuzonagura eparu lyomuntu dogoro nepata talizunguruka nsene asi nalyo wakere. Sinzi soyimpagwa eyi ayi horoka kuhwa kutundilira komarovhu ngwendi kusinga ehauto ove ono korwa. Yikorwesa hena kwahwa kuyiruganesa ehepeko vakadi,vanona,ntani kuvakwatera kononkondo dogoro kukahagera ko HIV/AIDS. Kira ezi zokoMpungu kwazitunga morupe rwantani azo kwakara nevango lyovaveli vahana asi kwavakondere nevango eli lyakara asi lyokukambadarera asi vantu ngano ngapi nava keverera yokugwana mazimo. Varugani womoministeli kwayimona asi mulyo unene vagwane kira morwa mukunda gwina kuna kara novantu wovanzi ntani siturwapo sepangero asi varete ukanguki pepi novantu unene wokonomukunda doponze zodoropa. Elizebeth Muremi mugendesi yipangero moKavango,hompa Munika Mbambo govambukushu ,hompa Sitentu Mpasi govakwangali, kansela David Hamutenya gwaMpungu ntani Kansela gwaKahenge yiwo kavakere poyiviyauka eyi. Kosihorokwa sokulikerera mukadona gonomvhura 18,kamonekere kompanguro morwa kudipaga mukeke gwendi ogu kahampurukire.mukadona ogu yige Suzzete Walters gomoRundu. Sihorokwa esi kasihorokerere mosipangero saRundu. Vaporosi yipo kavamukwete mukadona ogu koyiha yaKehemu rukanda rumwe rwadivikwa modoropa zaRundu. Mukadona ogu kalipoperere asi morwa ezimo eli kwaligwana mokumukwatera kononkondo age gahana kuhara mvhura ezi kazipwire. Moutano Agnes Murangi kamonekere kompanguro ogu vana kugazarera asi kapi arugana,nye yiyo kavamupere asi gahepa kupwaga, nye nsene nafuta yimaliwa yina siki ko N$1500 dogoro nkera age simpe momawoko govaporosi ana kara. Mugazarerwa kahundilire agwane vahahende vepangero,ano mpanguro zendi kava zirundwilire dogoro mwaSiwogedi 21.