Iizalomwa iikulu mbyoka hayi landithwa, otaku nyenyetwa tayi ningwa ondilo unene, tayi elekanithwa ishiwe neendando ndhomoositola.
Ofardu ngaashi ya tseyika nawa oya li ya tameke noondano ndhili pevi lela, sho kwali oshikutu to vulu okushimona koshimaliwa shili kohi N$50, ihe paife ofardu otayi pula okuza N$100, okuya pombanda.
Maria Shivute gwomOshakati okwa nyenyeta kutya, masiku itaya yi we komatala ya kalande iinima iikulu, ihe otaya shuka koositola ya kalande iikutu iipe oshoka oondando kadhiivule we.
“Onduuvite kutya iinima ohayi landwa, ihe ihayi landwa kondando oyindji unene, ngaashi taya tula oondando dha pitilila,” ta popi ngaaka.
Shivute okwa ti, nale okwali to vulu okumona ookahema koN$20 ihe nena otaya pula okuza N$100, kasha li mondjila.
Saima Sam okwa ti, shoka eshi, ofardu okwali ya nuninwa mboka kaaye na iiyemo ya gwana, opo ya vule okumona iizalomwa oshowo shoka hashi monika mo momatala kondando yili nawa.
‘’Ngame onda sholola, ihandi yi ko we komatala oshoka shoka kwali hashi tu fala ko ombiliha,’’ ta ti ngaaka.
Ta gwedha ko ta ti, paife aalandithi oya yi nomapopyo kutya ofardu oyi na iinima ya kola, shoka shi na uushili kombinga, ihe itaku ti, ya gwedhe ko unene kondando. Taya ti iikutu yimwe ohayi kala ya kulupa.
Okwa li ompito ombwaanawa shili okugandja kwaa mboka taya kambadhala, ihe ondando oyuuka unene pombanda.
“Otatu indile aalandithi ya shunithe oondando dhawo pevi, opo tu mone omukumo gokutsikila okuya sapota,” ta indile ngaaka.
Leonald Shipepepe okwa ti, elelo lyondoolopa nalyo na li talepo nawa poku pula ondando oyindji yehala.
‘’Ohatu pulwa N$40 mesiku okulandithila mehala ndyoka. Oshimaliwa shoka oshindji, omahala omakwawo moondoolopa ndhimwe otaga pula ashike N$10 mesiku. Paife otweya okulonga nenge otwee ta iimaliwa kelelo lyondoolopa,’’ta pula ngaaka.
Ta gwedha po ta ti, komatala ohaye ya ko taya lefa, taya futile iilandithomwa yawo, oshimaliwa nale shaya, sho osho taya kongo. Ta ti, oshimaliwa she hala nashi shune pevi, oshindji unene, shaashi noho ethimbo limwe oto vulu oku za ko wa landitha owala oshikutu shimwe nenge iyali. Ta gwedha po ta ti, yo oye ya okunyangadhala. Omugandji gomauyelele melelo lyondoolopa lyaShakati Katarina Kamari okwa ti, ota thikitha etumwalaka ndyoka kelelo lyondoolopa, notaka tseyitha shoka sha tokolwa po.
Kundana sho kwali a piti mo Omandaaha, omatala ngoka gopondje oge na aalandithomwa ya thika 700.
vkaapanda@nepc.com.na