KATIMA MULILO –  Sicaba sa Kongola silwanisa kufeliswa swalelele kwa muzeko wamasheleñi alikana bolule babane akulubelwa kuli hazibwi kwana ile kwa katengo kasikiliti sa Zambezi. Kweli yefelile milatu yabulyangelino ya muzamaisi wakatengo kasikiliti Regina Ndopu-Lubinda nibabañwi bazamaisi nefelisizwe swalelele mwa Khuta ya sikiliti. Muatuli mwa khuta ya sikiliti Clara Mwilima, mwaponahalo yanakonyana la 9 Muimunene, nalemusize babakulubelwa kuli taba yabona neyemisizwe swalelele kakuli bazekisi bamubuso nebasika itukiseza.

 “Bazekisi bamubuso habasika itukiseza kuzwelapili. Kacwalo neba fitisize kupo yakuli taba ifeliswe swalelele. Kono nako yeo bazekisi bamubuso habaka itukiseza, babanyazwa bakazibiswa kuli babonahale mwa khuta, nikuli ikaba mwa khuta ifi,” nabulezi. Ndopu-Lubinda ni banyazwa hamoho, muzamaisi wakulela Beaven Walubita, mubakweli wahae Cletius Mubita, muleli yomuhulu Daniel Mbala, ni mubakweli muzamaisi wakamaiso Abraham Shikoyeni hamoho cwalo ni muzamaisi mwa ofesi yasikwama Nimrod Lichela nebatamilwe mwakweli ya Yenda ñohola kikatengo kakalwanisa bulyangelino (ACC). 

Neba limbilwe milatu yemibeli yakusebelisa ofesi kufumana sesiñwi ni kulela kueza mafosisa. Walubita ni Shikoyeni neba talimana ni mulatu omuñwi wakufa bupaki bwa buhata kumubatisisi. Nebali kwanda tolongo kasamulaho akulifa N$50 000 yomuñwi ni yomuñwi. Muatuli nalaezi kuli bakutisezwe masheleñi abona. Kono katulo yeo inyemisize bane baswanela kutusiwa kimasheleñi ao, kutisa zwelopili kwa Kongola. 

“Kusiezi lilimo zesilezi kuli lufite kwa Pono 2030. Kana kikuli luna sicaba sa Kongola luka bona pono yeo haiba masheleñi abolulelule ane aswanela kutisa zwelopili asinyizwe kibasikai? Nekuswanela kuli kambe batu neba fumani misebezi nikutisa lisebelezo za sicaba bukaufi, kono cwale luka siala kuba batanga lilimo zemashumi amalalu kazene kasamulaho atukuluho,” nekubulezi Shebo Glenn, muinasipula wasicaba sesi bilaela sa Kongola. 

Babilaela hape kuli babanyaziwa neba sika ina ni mwatolongo nako yetelele mi neba tomezwi kulifa masheleñi akulibelela taba yabona kwande. Babulela hape kuli ofesi ya bazekisi bamubuso haibilaeli ni sicaba sa Kongola. Babulela kuli babata kuli taba ikute mwa khuta ya Katima Mulilo. Sicaba sifumbela kuli haiba kupo yabona haina kutalimwa mwa mazazi amashumi amabeli kaliliñwi ataha, sicaba sa Kongola sika caula.