Omunambelewa omukuluntu muuministeli welongo Sanet Steenkamp okwa ti, shoka tashi taambathanwa komalungula kutya oondjambi dhaalongi oshowo aaniilonga moshikondo shelongo otadhi ka tetwa pokati momwedhi gwaJuli, kashi shi shoshili.
Steenkamp okwa nyola ngaaka komalungula, ta ti, aaniilonga ayehe otaya ka mona oondjambi dhawo dhi li ngaashi dha kala.
“Oshigwana inashi landula omapopyo oshowo kehe shoka sha nyolwa komalungula kombinga yoondjambi tadhi tetwa pokati, kashi na uushili washa,” ta yelitha ngaaka.
Momushangwa gwa pitithwa kuSteenkamp okwa popi ta ti, oosikola adhihe mwa kwatelwa ndhoka dhopawumwene, okuza koondondo dhopetameko sigo okondondo ontimugoyi, otadhi ka tameke momasiku 4 Aguste nuumvo. “Uuministeli okwa li wa tokola okugwedha ko oshiwike shimwe komasiku ngoka kwa li ga tulwa po ngeno osikola yi tameke, omolwomukithi gwoCovid-19 tagu ende gu uka pombanda oshowo ekuthiikuthi ndyoka epe lya monika moNamibia,” ta fatulula.
Steenkamp okwa ti, oongundu okuza po 10 oshowo 11 itadhi ka tameka osikola oshipala noshipala momasiku 19 ngaashi kwa li sha tengenekwa, ihe otadhi ka longekidhwa pamukalo ngoka gu li po, okukwatathana naalongwa okuza momasiku 19-30 gaJuli.
“Ekonaakono lyondondo onti-11-12 lyokomumvo, otali ka tameka okuza momasiku 15 Novemba sigo 17 Desemba,” ta ti ngaaka. Ta gwedha po ta ti, aalongi oshowo aakomeho yomihandjo, ngele osikola ya tameke, naya kale ye li metonatelo ewanawa naalongwa, oku ya kwathela kaaya kwatwe nokukeelela omukithi gwoCovid-19 gwekuthiikuthi tu li mulyo, ndyoka anuwa lya nika oshiponga.
“Oosikola nadhi kale dhi na iikeelelitho ayihe yokukeelela omukithi ngoka, naalongi naya kale ya kwashilipaleka kutya oompango adhihe otadhi landulwa,” ta kumagidha ngaaka. Steenkamp okwa kumagidha natango aalongi ayehe ya tuntilwe, okukeelela ompito yomukithi gwocorona showo uuwehame nomaso.
“Uuministeli welongo owu li metifa okulongekidha otuntila poosikola, kehe moshitopolwa, opo aalongi oshowo aalongwa mboka ye na ehalo lyokutuntilwa, ya tuntilwe,” ta ti ngaaka.