KOPANO ya Swapo ne kile ya keta bayemeli banee bata yema mwa lipula zenee ze tuna za kopano, ili lipula zeta lwanelwa mwa liketisa za kopano ze lelezwi mwa libiki ze taha.
Kuketiwa kuba banee ne ku ezizwe biki ye felile kwa ndu ya simubuso, yona ndu ya Mueteleli wa naha.
Kwa mukopano o, Mubakweli ku Mueteleli wa kopano cwale, ili yena Mueteleli wa naha, mutompehi Hifikepunye Pohamba na kilwe a ketiwa kuli a kone kuyema mwa sipula sa kopano sa kuba Mueteleli. Pohamba uta yema a nosi mwa sipula sani cwale.
Yo nali Ngambela wa naha sapili, ili mutompehi Hage Geingob na kilwe a supiwa kapa ku ketiwa ki mufumahali Pendukeni Ithana kuli a kone kuyema mwa sipula sa Mubakweli ku Mueteleli wa kopano.
Geingob na supilwe hape ki mutompehi Ngarikutuke Tjiriange.
Ze ni hane li zamaile cwana ka kuketa Geingob kuli a kone kuyema a nosi ni yena mwa sipula sani, mufumahali Netumbo Nandi-Ndaitwah na kile a bona kuli Geingob u swanela kulwanela sipula sani ni musali mi kacwalo na kile a keta Ngambela yo Munyinyani wa cwale ili mufumahali Libertina Amathila kuli a kone kulwanela sipula sani ni Geingob.
Amathila na kilwe a ketiwa inge a siyo mi kuta tabisa ahulu kuziba nji Amathila uta yema mwa sipula sani kapa awa, kakuli sapili na kile a taluseza ba mutende o kuli hana kuyema mwa lipula za kopano zene zeo kaufeela zona.
Ithana, Tjiriange ni mutompehi John Pandeni bata lwanela sipula sa Mun`oli yo Muhulu wa kopano haa mufumahali Nandi-Ndaitwah hamohocwalo ni mutompehi Nangolo Mbumba bata lwanela sipula sa Mubakweli ku Mun`oli yo Muhulu.