Victoria Kaapanda
OKANDO -“Kandi shi omuhikingalo, ihe ngame omwiimbi,” General Mandala geEpafu ta ti ngaaka, ye ta fatulula nkene onkalamwenyo ye ya yonagulwa kwaamboka haya ningi ookopi oongalo dhaahikingalo.
“Okukala omuhikangalo ohashi pula oshindji, ohatu longitha iimaliwa yetu okuya koostudio noku eta po omambo goongalo ngoka nelalakano lyokulanditha tse tu mone oshimaliwa shoka twa longitha oshowo oshimaliwa shomboloto yetu”. geEpafu ta ti ngaaka.
Mandala ta ti aakwashigwana oya thimininike oonkalamwenyo dhawo kongudhi noku dhi lyatela pevi, ta ti otaya kondjo ya hala oku za moluhepo ihe otaya undululilwa mo natango.
Ta gwedhapo ta ti oongalo dhawo otadhi ningwa ookopi nokutulwa muUSB yo taya tula momamandjukundjuku gawo, taya ningi iimaliwa noongalo dhawo omanga yo mba ya etapo oongalo ndhoka taya tala pombanda.
“Mboka owo uukoloni hawu popiwa, oonkondo odhandje ihe ngame itandi mono sha. Out na ashike omapakete momagumbo ga udha uuCD oshoka kape na ngu te wu landa. Oye na nale ookopi muuUSB”.geEpafu ta yelitha.
Moonkundathana naKundana Mandala geEpafu okwa ti ye ita mana po we ethimbo lye noku epeka iimaliwa a ka hike oongalo koostudio noku eta po okaCD.
Ye ngashingeyi omwiimbi ashike, ano ye okwa inekela moshiketala moka ha mono okashona hoka ha mono shi vulithe okulanditha uCD ye ta kana.
Ta kumagidha ta ti ooyene yoondingosho inaya longitha we ookopi. Oshoka otaya shunitha oongeshefa dhaahikingalo monima. Omanga yo taya ningi iimaliwa tayi zi moonkondo dhaahikingalo mboka ihaya monoko sha kookopi ndhoka.
Omwiimbi gwomayimbililo okwa ti okwa kanitha N$48 000 sho a li a ningi oalbuma ye yahugunina ndjoka y ali ye mu shololitha opo a kulukile moshiketala.
Ta ti oshiketala she ihashi mu uvitha nayi, oshoka ngele a kuutumba pehala, ihe ta tameke oku shi dhenga shoka noku ulika uunkulungu wewi lye nena oyendji ohaya kunguluka ko kopate e taye ya ya pule eyimbilo ya hala okudhengelwa ye ta dhengwa okati koonyala.