NKURENKURU – Mapokola mwa Kavango ya Wiko, kukala kweli ya Muyana, basweli mabala amyanda ye mine ane akenyizwe isi kamulao kuzwa naha Angola. Kuna ni musha kanako ya cwale ohanisa kulema likota. Mabala amyanda ye mine nakenyizwe mwa naha kakusebelisa miseto yesika lumelelwa kwa mukulela wa nuka ya Kavango. “Hakuna likota zelumelezwi kufita kwa miseto ya mulao, sina Katwitwi. Lufumani lipiho zeñata za likota ze kenywa mwanaha kusina mañolo, kakusebelisa miseto ye sika lumelelwa,” nekubulezi Mulauli wa sipokola sa Kavango ya Wiko, muzamaisi Julia Sakuwa-Neo.

Nabulezi zeo kanako ya mukopano ni ba bihi ba makande viki yefelile, teñi naize likota zene ba amuhile batu kuzwa kweli ya Sikulu unumwaha lise lilekisizwe ki likolo la misebezi. Muzamaisi nafile mamela kuli libangoki ze nahana kuli Nkurenkuru ki tolopo ye nyinyani kapa Kavango ya Wiko ki sikiliti se si lobezi teñi bakona kueza bubangoki mobalatela, kuli baka tilimuka. 

“Lukumalezi kubona kuli bubangoki mwa sikiliti se bwa fukuzeha, haiba habufeliswi. Musebezi waluna ubonahalile kakufumana buñata bwa libyana zene uzwizwe, teñi lipiho za kutuba mandu ni busholi mwa libaka za lipisinisi ni maino abatu, kulema ni kuluwa likota isi kamulao, busholi bwa mafoni, kaufela neli bihilwe mwahala likweli za Kandao ni Muyana 2024,” nabulezi.

Sakuwa-Neo naize sikiliti sa Kavango ya Wiko sikatalizwe ki bubangoki bwa kulela, buñata ba bataha kuto peta likezo zeo kuzwelela kwa likiliti zeñwi. “Zeo luezize ki zende mi lushunguzi molipetelwa likezo za bubangoki. Luka tama batu kaufela ba bataha kwanu kuto eza bubangoki. Sikiliti sikumalezi kwa musha wakuli ‘makatulo mwa musipili musihali ni busihu,” nabulezi. Mwakweli ya Muyana feela, mabala alikana myanda ye mine naswelwi kimapokola kasamulaho akulemuha kuli nebasina mañolo.

“Zeo neli konahalile kamusebezi wamapokola waviki mukatumbi. Mabala amyanda yemibeli naswelwi la 19 Muyana 2024 mwahala nako ya 00h40 ni 02h00 mwandu mwa silalo sa Katwitwi, mi mabala amwanda ni mashumi asupile naswelwi mwa viki yeswana mwasilalo sa Katwitiwi mwa Kavango ya Wiko, hane alongilwe kimotikala kuliba kwa sibaka sene si sikazibwa,” nabulezi. Mulauli wa sipokola naize ba banyazwa mwa likezo kaufela zepeli nebasina mañolo akuli baleme likota kuzwelela likolo leli swanela.

Lwa itumela kwa sicaba kaswalisano yeba bonisanga mwalitaba ze cwalo. Mabala nafilwe kwa likolo la Silalanda ni Mishitu,” nabulezi. Sakuwa-Neo naize mwakweli ya Kandao unumwaha, taba ya busholi kuzwelela sibaka sa mapangelo alimotikala sa Kambinda mwa Nkurenkuru, teñi neba uzwize giyapokisi, maboni amabeli atirakita, ni kirankishafuti, kaufela za masheleñi alikana N$45 000, nebihilwe ki mapokola.

“Mwa kweli ya Sikulu, ba bakulubelwa mwa taba yeswana nebakutile kwa sibaka sesi swana, kuyo uzwa giyapokisi ya tiraki ni liwili, za masheleñi alikana a N$35 000. Ba bakulubelwa ba balalu neba tamilwe, mi nelukonile kufumana kaufela zene uzwizwe mwa Rundu. Neba limbilwe mulatu wa busholi, mi kanako ya cwale ba mwa sitokisi sa mapokola kasamulaho akuhanelwa kulibelela muzeko wabona kwande atolongo.