Khoekhoegowab, Languages

Kupembonab ge ǂōrisase daoba sîsenūsa ra ǂgan daogu ai ra hâ autotsūke!gâna ǀoroǀoros ase

2024-12-172024-12-17By Isai Sipunga
Kupembonab ge ǂōrisase daoba sîsenūsa ra ǂgan daogu ai ra hâ autotsūke!gâna ǀoroǀoros ase

TSOAXUBAMS – Erongob ǀawa!namn komisareb, Nikolaus Kupembonab ge ǁîb di ǀgaisa ǂâiǂhansensa Namibiab a ǂhabase ra hâ autotsūke!gân di ǂharora !gôagu ǂnamipe gere gowaǂui. Kurikorobe ra hâ Daob !Norasasib Hōhō!nâs tawa gere māǂuihe autotsūke!gân !gôagu khao!gâb ge nēsa gere ǂgan. 

ǁÎb di gowaǀîs !nâb ge ge ǂanǂan, 1 !Khanni dis tsî 31 Hôasoreb 2023ǁî kurib dis !nâb Namibiaba 98 autotsūke!gâna ge !nuri tsîn ǁîna xu 226 tsû-aina ge hâ tsî 13 khoena a ǁōǂoase. 

Nē mâsib ge nē kurib !nâ guis khami ī ǀkharaǀkharasi-i tsîna hā-ū tama hâ, ǁnāpan 91 autotsūke!gân !nae!khaidi, 227 tsū-ain tsî 11 ǁōga 10 Hôasoreb dis kōse nēpa xu ge !huise ra !gôa!gôahe hîa. 

Nē !gôagu ge ai,!gûgaru ǂharo ra !gôagu ǁgoaǂuis ase daob !norasasiba ība, daob sîsenū-aon ǁîn ǀkhāba hā-ū tama is, daob ǁgaraga !gôa!gâ tama īs dis xa ra !aromahese. 

“Haisi-ams daob !norasasib dis ge a ǁau!gôahe ǁoa. Sida ge !gâi sîsengu hîa ai!â ge !kharu kurigu !nâ daob !norasasib mâisan xa ge ǁguihe tsî a ǁ-awoǁ-awohegu ai ra om,” tib ge Kupembonaba ge mî. 

Mîb geres ge, Namibiab ǀAwa!namn, nau !kharaga ǂhanuba mûǂams ǂnûiǂgādi tsî !âǀhuru-aon ǀkha ǀhaohâse ra ǁguiǂgāsensa !norasa !naris tsî daoba ǂhanuse sîsenūsa ǂgaoǂgao!nâsa.  Nē ǁgūtsâdi ge hoa kaitsēdi ǁaeb tsî ǁnās khao!gâs tsîna nî !kharu!kharuhe. 

Daob !norasasib mâisan ge !norasa !narisa nē kaitsēdi ǁaeb !nâ ǁ-awoǁawos ase B2 !hū!nāsi daogu ais tsî ǁawosase mâisa daogu ǁkhaedi Tsoaxubams tawadi tawa a sîsenxa. 

Erongob !nās !aroma di -ge !nāsasen autotsūke!gâna ra hō!â!nâhe !âgu !nâ ǁaeroba nî mā ǁkhae-made nî sîsenxa, ǂgaiǀons ai Yianni Savvas, Hentiesbays, Arandis tsî ǂGaribeb !nâ. 

Kurikorobe ra hâ Daob !Norasasib Hōhō!nâs hîa 11 Hôasoreb 2024 !nâ ge ǂhaitsise a ǁkhowa-amhes ge 17 !Khanǀgôab 2025 dis kōse nî !khoe. “Nē hōhō!nâs ge ǂâisa !nāsase autodi māsa !gomsiba !nao!nās, auton daob ai hâs mā-amsa ūhâs tsî !nari-aon tsî auton daob !norasasib ǁgaragu tsî ǂgaoǀkhādi ai ra dīǀoaǀoasa nî -ǁawoǁawo. 

Khāti da ge āhâse !naris !âidi, mā-amsa !garisiba !nās tsîn !nās ai khoe-e khom tide,” tib ge Kupembonaba gere ǀgonǀgon!gao.