MUETELELI wa kopano ya DTA, mutompehi Katuutire Kaura uli naha ye isa talimezi kozi tuna mwaliluko la tuto mi ka cwalo, na kile a akaleza kuli baituti baba siyala sitopa sa giledi 10 bano fiwanga sibaka sa kukutela sitopa se, sihulu silimo se. Hana kile a biza mukopano ono memile mitayi ye shelana ya makande, Kaura naize mwalitatubo kaufeela za ziba yena, kusiya ha kuswaneli kufitelela kalulo ya mwanda ye likana 15 percent kono mwanaha mo kusiyala nenze kufitelela kalulo ye likana 99 percent ili nto ye swabisa hahulu. Membala wa ndu ya milao wa kopano ya DTA na kile a fa mutala wa sikolo se sin`wi mwasikiliti sa Omusati ko mutituti ali mun`wi hala baituti ba 21 ki yana kile a pasa sitopa sa giledi haa, ba 20 kaufeela bona neba siyezi. Na ekelize kubulela kuli, hakuna tuso ya kulumela baituti baba cwalo kwasikolo sa Namcol isi kuba lumelela feela kukutela. Mueteleli na talusize kuli kuzwa naha I fumana tukuluho, naha inze bulelelwa feela kaza lituto za mahala kiba kopano ye busa ili lituto zesa boni liseli. “Puzo ki ya kuli kana lituto kiza mahala mwanaha kapa linze li sweli feela kuno tula silimo ni silimo.” Na kile a nyaza kopano ye busa kuli ketelelo ya tuto ya kopano ha ki yona hande mi kacwalo inze sweli feela kuno beya palo ye pahami ya ba banca mwamakululu. Kaura na kile a bulela kuli mateho sakata ya likolo ki ya butokwa kono bun`ata bwa likolo za tuto kakuya ka yena, li inzi mwamaemo a maswe ni kutisa kuli limbule zen`wi lino wela baituti inge bali mwalikeleke. Naize ka zona limpangaliko ze, silalanda sa tuto sinze si sweli kuno swandaulwa mi kacwalo na kupile Likwambuyu wa Likolo la Tuto, mutompehi Nangolo Mbumba kuli a eze se sin`wi mwanzila ye.