ONGWEDIVA – Aakwashigwana naakwanezimo yanakusa Ekandjo Mateus Ekandjo wokOupumako moshitopolwa shaShana anuwa oya kumithwa komaihumbato gopolisi yomoshitopolwa sho anuwa ya kwata po aantu ye li 10 moosa, ye shi ningi shi ikolelela anuwa kolopota ye yi pewa kohonda-kadhona yaEkandjo.
Aakwanezimo mboka oya holoka nale ohela komeho gompangu noya pewa kehe gumwe a ifutile mo mondholongo noN$2 000.
Otaku hokololwa Ekandjo a hulitha sho anuwa a imangeleke oshiwike sha zi ko koSwakopmund.
Aakwanezimo mboka mwa kwatelwa okanona kosikola komimvo 17, oya kwatwa po sho ya patululilwa oshipotha shokweehameka omuntu nomatilitho oshowo eshundulo lyomuntu shoka sha patululwa kukuume komiihole gwanakusa gwedhina Hileni Samuel a zile kOkatope kOukwanyama. Kiipotha hoka okwa gwedhwa ishewe shimwe, sha patulilwa omumayinagona gwanakusa ngoka a li e na ongodhi yaEkandjo.
Sho oshifokundaneki shika sha pula Samuel a tye ko sha kehokololo ndika okwa ti oku li natango mengwangwano, ita vulu okutya ko sha.
“Ihamu yalula uuntu womuntu komeho goonkundana, itandi vulu okupopya manga,” ta yamukula ngaaka.
Omugandji gwomauyelele gwopolisi moshitopolwa shaShana Thomas Aiyambo okwa ti shoka tashi popiwa kaakwanezimo kutya oya adhika ya mwena kopolisi kashi shi shoshili oshoka opolisi oya li ya ka tula po ombili sho ya adha aakwanezimo taya nyenyeta naSamuel.
“Oshipotha shoka sha gwedhwa ko kuSamuel shongodhi, ngiika okwe shi patulula oshoka oku uvu nayi sho a kuthwa ongodhi yomuholike gwe, oshoka oye a kala e yi na,” ta popi ngaaka.
Samuel nanakusa Ekandjo anuwa oye na uunona uyali. Okanona kosheeli oke na omimvo 13 oshowo onkelo yoomvula mbali.
Otaku hokololwa kutya omukiintu ngoka okwa li i ithana opolisi esiku Ekandjo a fumbikwa, ta ti okwa ponokelwa kaakwanezimo nomalaka, omamanya nonomakende.
Muuaudio wa uvika kuKundana, wa kuthwa pethimbo kuume kaSamuel a ithana opolisi yamwe yomwaamboka ya li naSamuel oya li mo taya ula ofamili yanakusa kutya otayi ya li – oshinima shoka pakutala sha li shi uvitike komupolisi ngoka a yamukula ongodhi.
Omukiintu (kahewa kaSamuel) okwa lombwele wo opolisi kutya Samuel naEkandjo oya kala oomvula odhindji noya li ye li pokuhokana. Ta ti aakwanezimo yaEkandjo oya tameke nale okutumba mo iinima yaEkandjo megumbo lye lyokoSwakopmund.
Gumwe gwomaakwanezimo yanakusa Ekandjo, Mateus Kashipwa okwa ti, aakwanezimo yawo oya dhitikwa pwaa na uushili, nehokololo lya gandjwa komukiintu ngoka kali shi lyoshili.
“Out li momalimbililo oshoka opolisi oya fa tayi longele kumwe nomukiintu ngoka omolwiiningwanima tayi ningwa pokati kopolisi naye. Otashi ende ngiini opolisi yi mange po aantu inaaye ya pula nande osha, inaya mona nee nande uumbangi tawu ulike kutya kakadhona ngoka okwa tilithwa nomakende ngoka ta popi, yo taya patululile omuntu oshipotha sho a adhika nongodhi yamumwayina, taye shi ningi palombwelo lyakakadhona?’’ ta nyenyeta ngaaka.
Kashipwa okwa hokolola kutya omukiintu ngoka okwa kala e li mekwatathano lyopahole naEkandjo, ihe okuza muApiilili ekwathano ndyoka kalya li tali ende nawa sha etithwa kuEkandjo ngoka a vala po okanona kaake shi komukiintu ngoka.
Ekandjo naSamuel anuwa oya kala kaye uviathane, naSamuel okwa li a tembuka mo megumbo lyaEkandjo. Oshinima shoka anuwa osha eta sigo Ekandjo ta yi kofamili ye e ke yi lombwele uupyakadhi mboka wuli pokati kawo.
“Nonando Samuel a li a lalekwa, anuwa okwa kala nokutalelela po egumbo lyaEkandjo. Ekandjo okwa li a tseyithile aakwanezimo ye yopaali kutya ita vulu okukala kee li nomukiintu ngoka, oshoka uulumentu we inau kala we tau longo uuna kee li naSamuel nuuna e li naye ohau longo owala nawa,” ta hokolola ngaaka.
Kashiwapa okwa ti, osha li Omaandaha goshiwike sha zi ko, ofamili oyu uvu onkundana kutya ekandjo okwa hulitha, i imangelekele megumbo lye naantu mboka ye mu mono tango okwa li a monika kuSamuel nomumwainagona gwaSamuel – nonando Samuel nanakusa ihaya zi pamwe.
“Aakwanezimo yetu mboka ya yi koshitondoka koSwakopmund oya ti, oya adha omukiintu ngoka e li moshikutu shaEkandjo shokulala, a kuutumba pokatalashe a fa omuselekadhi. Shoka osha kumitha aakwanezimo yetu, oshoka inaya kala mekwatathano ewanawa, ina hokanwa, ye ihazi mooEkandjo opo andola a ninge shoka a ninga,” ta popi ngaaka.
Ta ti nande ongawo inaye mu pula sha.
Ta hokolola ta ti: “esiku lyoshituthidhimbuluko shoka sha ningilwa kOupumako, Samuel okwa thiki megumbo lyetu nuunona wawo uyali. Okwa li wo e li naakiintu yaali yaanyasha oshowo omukukadhi gwomukuluntu, yamwe otaya ti oyina.
“Esiku Ekandjo a fumbikwa aakwanezimo oya li ya gongala lwopotunudi 20h00 ya kundathane, noya li ya pula andola Hileni a kale po poonkundathana ye a gandje uuyelele mboka e na oshoka oye a mono nakusa tango.
“Oshoka Hileni okwa li a lala nale mokatenda ke hoka a li a dhika, kuye okwa tumwa omusamane gumwe gwomukuluntu, ngoka a kala naye mekwatathano pethimbo kayi iyuvite naEkandjo, e mu ithane koonkundathana. Anuwa okwa yamukula kutya ita penduka okwa sa oomposi, shapo naya tegelele esiku lya landula ko.
Anuwa shika osha uvitha nayi aakwanezimo, mboka yamwe yomuyo ya tameke okulila noonkondo. Nonando ya kala taya nyenyeta momutumba gwao moka, kape na ngoka a thiki ko kotenda yaSamuel e mu thiminike nenge e mu mbandameke ngaashi a lombwela opolisi.
Aakwanezimo anuwa oya tokola ya ka lale, manga yamwe ya kala ya hungila.
“Omanga twa lala, out uvu aantu taya popitha nani opolisi ye ya anuwa okutula po ombili oshoka ope na aakwanezimo yanakusa taya ponokele yina yuunona wanakusa. Otwa li twa ngwangwana oshoka kakwa li tu na uuyelele mushoka taya popi, ishewe katu shi kutya olye e ya ithana,” Kashiwapa ta hokolola ngaaka.
Ta gwedha po ta ti opolisi esiku ndyoka oya yi naSamuel nosheendo she oshowo uunona.
Ta ti, ongula yOsoondaha konima ya yomwaale, oya mono anuwa okabetsa kopolisi ke na aapolisi ya homata oondjembo oshowo embamba lya landula ko.
“Opolisi oya manga po aantu 10 mboka ya tothwa mo kuSamuel sho anuwa ya kambadhala oku mu ponokela nomamanya nonomakende omanga a lala motenda ye, ashike okwa popi iifundja oshoka aantu yamwe a totha mo yamwe kaya li mo nomegumbo ethimbo lyoshiningwanima. Okwa totha mo owala aanegumbo ayehe yooyinakulu yaEkandjo mwa kwatelwa okanona koomvula 17 kokanasikola. Okanona hoka otaka ningi omatilitho gashike?” Kashiwapa ta popi ngaaka.
Kashiwapa okwa ti, sho aakwanezimo ya yi koshitaasi Samuel okwa lombwele gumwe gomaapolisi opo a kuthe ko ongodhi yanakusa kaakwanezimo.
“Mongodhi omu na shike tashi kondjelwa kuSamuel inaa hala sha monika? Ishewe omupolisi gumwe anuwa okwa pula ngele aakwanezimo naya gandje omahokololo gawo, ashike Samuel okwa lombwele aapolisi kutya inashi ningwa. Otashi ende ngiini opo aapolisi ya iyuthe komalombwelo gomukwashigwana? Omolwashike opolisi inaayi gandja ompito kaantu manga inaaye ya patela mo?” Kashipwa ta pula.
Aantu yopomukunda mpoka oya ti oya kumithwa koshiningwanima shoka, unene ngaa sho Samuel nayina ye ya okulala oosa dhaEkandjo.
“Oshinima shoka ihashi ningwa mOshiwambo. Okwa li owala e na okutuma ko aakwanezimo lye ya fale aanona, nongele okwa li a hala okukala po, andola okwa ya owala esiku lyefumbiko. Ye anuwa okwa li a kuutumba pokatalashe a ininga omuselekadhi. Otashi kumitha shili,” omukwashigwna gumwe ta ti.