WALVIS BAY – Elenga enene Sagarias Seibeb olya tsuwa iilyaalyaka ongomuleleli gwelelo lyoDaure Daman Traditional Authority. Eumbeko koshipundi olya li lya landula sho aakwashigwana ya hogololoa kutya oya kanitha eyinekelo muye, mboka taya ti oku na uuleli uuwinayi, okakombo noludhi, nota eta etopauko mokati kAadure Daman.
Elenga ndika ihaali galukwa koohapu, anuwa olya li oshikando shimwe lya mbendekwa oombumbo dhuumboloto wuumbeenga, iipundi yiipulasitika noshilaliwa shoN$10 000 opo a shaine oombapila dhepitikilom lyokufulwa iikwamina moshitopolwa.
Seibebe okwa li a ulikwa ongelenga lyaaDaure Daman momumvo 2017 konima sho elenga Elias Thaniseb lya hulitha. Ashike, pethimbo lyoshigongi shaakwashigwana shoka sha li ko mOlyomaklaya moUis, aakwashigwana yomuhoko ngoka oya li ya hogolola Seibeb a ze koshipundi nokupingenwe po kuIssaskar Tourob, ngoka a li omulongisikola nale.
Omuhwahwameki gwiipambele yaDaure Daman, omugundjuka gwedhina Jimmy Areseb, okwa li a popi pehala lyaakwashigwana noshikundaneki shoNew Era mOmaandaha.
“Eeno, oshigwana osha li sha tokola okukutha ko elenga lyetu. Nonando ka li po poshigongi, otwa li twa landula omilandu konima sho twa kundathana nuuministeli osho wo omunashipundi gwomalelo gopamuthigululwakalo, elenga Immanuel /Gaseb,” Areseb ta ti ngaaka. Ta ti oshikando shahugunina ya li ya ya moonkundathana nelenga lyawo ongaakwashigwana osha li momumvo 2019.
Okwa gwedha po kutya oontumwafo dhi na sha naashoka sha ningwa po oshitalala otadhi ka tumwa koongundu adhihe dhi na mo olunyala, mwa kwatelwa ngoloneya gwoshitopolwa shErongo Neville Andre, minista gwomayambulepo giitopolwa yokuushayi Erastus Utoni osho wo elenga /Gaseb.
Areseb okwa ti etokolo lyokukutha ko Seibeb olya zi komidhi dhelongithonayi lyiimaliwa, osho wo okukaleka oshigwana mondhima shi na sha niipambele yawo. Oshiningwanima shelongithonayi lyoshimaliwa osha li sha lopotwa kokakomisi kokuungaunga nokulunga twiitapula koAnti Corruption Commission omumvogali.
Kuyele nuumvo, omukandanyenyeto ogwa li gwa pewa Seibeb kaakwashigwana mboka taya tik e na nayo, noha ningi omatokolo ge mwene.
Aakwashigwana oya li wo ya pula uuministeli wu na sha niipambele yopamithigululwakalo wu konaakone omwaalu gooakaunta dhombaanga ndhoka dhi li medhina lyelelo, osho wo ngele olyi na iipambuliko miikwahi. Oya pula pu ningwe omakonaakono nkene iimaliwa yelelo hayi longithwa. Oya ti oya li ya thiminikwa ya kuthe onkatu ndjika oshoka Seibeb okwa eta etopauko moshigwana, nokwe ya Kaleka mondhima ngele tashi ya kiinyangadhalwa yin a sha nehumokomeho lyoshigwana, mwa kwatelwa nooprojeka dhoGreen Hydrogen.
“Elenga lyetu ohali pitike aanangeshefa ya tameke okulonga inaapu landulwa omilandu. Ohatu mono ashike aantu taye ya miitopolwa yetu kaatu shi shi, taya tameke okufula, anuwa evi oye li klanda kelenga,” taya ti ngaaka.
Elenga epe
Tourob, ngoka a hogololwa ongelenga lyopakathimbo, ota ka pewa oshinakugwanithwa shokutota po ewawa lyaagundjuka osho wo iitayi yilwe yopamuthigululwakalo. Sho a pulwa ohela, Tourob okwa ti shika oshinakugwanithwa oshinene komapepe ge a pewa.
“Inandi mona natango omukanda, ashike onda tseyithilwa etokolo lyawo. Nonando ongawo, kandi na omukweshe okukutha po oshinakugwanithwa shoka. Ondi na ashike etimaumbwile kutya otatu ka hangana atuhe,” ta ti ngaaka.
Sho kwatathanwa naye, Seibeb okwa lombwele oshikundaneki shoNew Era kutya omapulo ngoka a tuminwa okwe ga mona. Ashike okwa ti mboka ya kwatela komeho ekuthoko lye koshipundi shuulenga oya li ya kwatathana naye kuyele, ashike naya dhimbulukwe anuwa kutya kashi shi oshipu okukutha elenga koshipundi.
“Ito vulu okutota ongundu wu umbe ko elenga,” ta ti ngaaka
“Ope na okamufofodholo anuwa onda yaka iimaliwa, shika otashi sitha ohoni. Kape na uukwashili washa mpoka. Ngele onda yaka iimaliwa, naya thinde po-ACC. Aagundjuka mbaka, pehala lyokukwathela elenga lyawo, otaya tondoka nomapandaanda taye li sheke,” ta fatulula ngaka.
-edeklerk@nepc.com.na