ONGWEDIVA – Omauliko opaipindi oo a li a tangenekwa okutameka mo 28 Aguste 2023 e na sha nomanengeshefelo opedu nao osho a tameke.
Ovanangeshefa ova mboboloka okudilila koitukulwa ya yooloka opo va dulule okuuya okushingifa oikulya yavo.
Omuungenaki nomukwatelikomesho woshivilo Hiskia Hiskia okwa tumbula kutya yee oku wete ei omhito iwa opo ava ve na eengeshefa di li pominghulo dopate oshoyo ovanyasha ve li momaumbo hava teleke oikulya ve uye va kufe ombinga mokuteleka.
Okwa weda po yoo kutya okuwete kutya oshiindingili otashi ende nawa, novanhu vahapu otava ende lela okudja keenhele da yooloka.
“Ondi uditile yoo ava va dja koitukulwa ihapu yokomakule nawa shaashi ova tauluka eedoolopa dihapu okuuya ashike kOngwediva,” Hiskia ta tumbula.
Hiskia natango okwa yelifa kutya outala vaye okwe va ningila ombilixa shaashi okwa tala keekonomi loshilongo oshoyo keenghalo ovalandifi vahapu vomangeshefelo opedu omu ve li.
Umwe womuvo okwa tumbula kutya yee oku udite owuumbo shaashi okwa pewa omhito yokulandifila pondje yeumbo.
Eshi natango oshe mu kwafela shaashi oshe mu pa omhito yokuhangana oshoyo okukala e li mekwatafano novanhu vahapu ngeenge tashi ya kwaavo hava kala va hala okulanda oikulya yaye.
Ovakufimbinga vahapu ova hokolola kutya voo ova hala ovanhu vahapu natango ve uye va landife pamwe navo voo va mone oimaliwa pamwe.
“Eshi shi udifa nawa osheshi kutya outala vokulandifila ove na ombilixa lela, navahapu ve na omangeshefelo opedu ottava dulu lela okulanda outala vavo vokulandifila,” umwe ta tumbula.