Ondokotola yoshipa Tinashe Maphosa koshipangelo shopaumwene shaNdangwa (OPH), okwa kumaida oshiwana opo shi liamena komutenya, eshi oshilongo shi li mekufikufi loupyu.
Dr. Maphosa okwa tofa mo edengo lomitima, eembulwa koshipa neembulwa detandavelo leembakiteli hadi endele mokupusha, onga imwe yomomaupyakadi haa etwa koupyu wa pitilila.
Ta ti omutenya natango ohau etele olutu omapuva, oipute oshoyo okaanghela molutu. Natango vati ohau dulu yoo oku dindika olutu lomunhu.
Maphosa okwa twikila kutya nonande ekufikufi loupyu la nyika oshiponga, natango ope na omikalo da yooloka dokuliamena komakufikufi ngaashi okunwa omeva mahapu, okudjala oikutu ya tuvika olutu, okuvava omaadi okulikeelela komutenya, oshoyo okukala u li momudile efimbo alishe.
“Okwa ti okudja meeedula dakapita fiyo opaife omwaalu wovanhu ava va kwatwa keekaanghela doshipa da yooloka onghee ngaho tau pula komesho. Paife out na omwaalu wovanhu ve li peemiliona mbali fiyo nhutu ve na okaanghela yoNon-Melanonoma novanhu va fika po132 000 vena okaanghela yoMelanoma mounyuni aushe.
Onooli yoshilongo okwa teelelwa i twikile noupyu wamemememe, nekufikufi eli loupyu otali ka ndjena neenghono momafiku atatu twa finda.
Omukulunhu wombelewa yetenengeneko longhalo yomhepo Odilo Kgobesti, okwa tumbula kutya etengeneko lekufikufi loupyu ola teelelwa li ka kale peedegree 36.
“Oshilongo ashishe, mwa kwatelwa yoo oitopolwa aishe yokoushilo woshilongo otai ka kala i na oupyu wamatutu,” Kgobesti ta tumbula.
Okwa twikila kutya natango oitukulwa ihapu yoshilongo ei i na oupyu wa ninipala oya teelelika i ka kale nayo ya pupyala neenghono.
Moshivike tashi ya vati oshitukulwa shanooli osha teelelwa shi ka kale sha ndjena neenghono. Eshi vati osha etifwa kewangadjo la pupyala unene molwaomhepo ya pitlila i li meenhele da tengenekelwa omakufikufi oupyu.
Ovanongononi ova tofa mo enyateko lewangadjo onga shimwe shoyeetifi yomakufikufi oupyu.