WINDOKO – Patisiso yene ezizwe mwasikiliti sa Zambezi, mwasilalanda sa Kabbe, ibonisa kuli balimili bamashumi amane ka alimuñwi (41), bamwaziezi kakuli masimu abona mwaminzi yeshelashelana, natibisizwe kimezi amuunda. Piho ibonisa kuli hala lihekele ze 39 zene calilwe, lihekele ze 28 seli tibisizwe kimezi amuunda, mi kuna nikolo yakuli lihekele zelishumi kailiñwi nizona likaswana litibiswa nako hainze iya, bakeñisa kuankufa kwakumata kwamezi amuunda. Kacwalo buñata bwabalimi nebahapelelizwe kukutula lico zabona lisika buzwa kale. Piho nendongwami hahulu minzi yecwale ka Jojo, Kandiana ni Bulila, ili yefumaneha mwasibaka sa Muzii mwasilalanda sa Kabbe ya Mbowela.
Patisiso yeo netahisizwe bakeñisa lipiho kuzwelela kwasicaba, ni John Likando ili muyemeli wasilalanda sa Kabbe ya Mbowela, hala masimu ane atibisizwe kimezi amuunda mwa minzi ya Jojo, Kandiana ni Bulila. Silalanda sa Kabbe ya Mbowela sifumaneha mwalibaka zetibiswa kimezi amuunda, mwasikiliti sa Zambezi, mi silimo ni silimo kubanga ni muunda. Hala sikwata sa patisiso nekuna ni limbembala zakatengo kasikiliti sa Zambezi, ni liluko la njimo, mezi ni mishitu, ili Likando, Jimmy Simataa kuzwelela kwaofesi yalitaba zaputako, Risco Maloboka kuzwelela kwaofesi ya silalanda sa Kabbe ya Mbowela, Allen Mathe kuzwelela kwaliluko la njimo, Chrispin Siboli, ni Zambwe Mbukusa kakuyemela sicaba.
Likando naize muunda one utibisize masimu notisizwe kimilapo yesilezi, Makapweka, Nakawa, Mulalo, Silaha, Samundi ni Kachele ili yesululela mezi kuzwa mwanuka ya Lyambai kuisa mwamabala atibiswa kimezi amuunda. Pula yeñata hainze inela naha kaufela hamoho cwalo nimwalinaha zeli bukaufi, mubusisi wasikiliti sa Zambezi Lawrence Sampofu nakile anitifaza kuli, libaka zeñwi za sikiliti sa Zambezi, sihulu mwasilalanda sa Kabbe nese litibisizwe kimezi amuunda. Mwakweli ya Ñulule, katengo ka Sadc neka kile kafa mamela kuli linaha zateñi, kungelela cwalo ni Namibia, lika amuhela pula yeñata, ili yekona kutisa muunda.
Sampofu naize muunda utaha bakeñisa kuli nuka ya Lyambai setezi, bakeñisa pula yeñata mwalinaha zeli mabapa za Angola ni Zambia.
Kasamulaho apatisiso yene ezizwe, sikwata nesikile safa likelezo, neba elelize kuli patisiso yetezi iezwe kililuko la njimo, mezi ni mishitu kapilipili, hala masimu kaufela abato tibiswa kimezi amuunda mwalilalanda za Kabbe ya Mutulo ni Mbowela.
Neba elelize hape kuli liluko la njimo, lieleze sicaba sesifumaneha mwalibaka zetibiswa kimezi amuunda, kuno cala lico zebuzwa kapili, ili kuli babe nikutulo sakata. Kelezo yeñwi kiyakuli lituto hala kuitukiseleza muunda kizabutokwa mwalibaka zetiba, kakuli mezi amuunda abonahala kuankufa, mi akaswana akwala linzila zeya kwateñi.