LIKWAMBUYU wa Likolo la za Mwahala Naha ni Miseto, mufumahali Rosalia Nghidinwa uli Likolo la hae seli kupile kape pene ya palo ye likana N$48 million ya kubona kuli miseto ya naha ni bayahi ba yona ba mamelwa ka tokomelo. Hana toloka kaza musulo mwaNdu ya Milao la bulalu sunda ye felile, Likwambuyu naize ka kutalima fa mabaka a kuli naha South Africa ita mema lifasi kamukana kwakwinano ya mbola ya mautu ya lifasi mwasilimo sale sa 2010, ni kubona kuli naha Angola ni yona ita mema lifasi kwakwinano yam bola ya mautu ya lifasi la Africa mwasilimo sesi swana, naha ye ni yona ita bona palo ye pahami ya batu kalibaka la likwinano ze peli ze mi kacwalo ki kwabutokwa kuli kubeiwe mihato kaufeela ye swanela kwamiseto ya naha mwanako ya cwale ye, kakuya ka Likwambuyu. Na tiisize kuli lisebeliso kapa mane makwakwa ali ten`I mwanako ya cwale kwamiseto ya naha ye, ata tisa feela kuli mane kube ni likayamana kakuli kusa tokwahala ni minshini sakata yeta bona kuli libangoki hali lumelelwi kukena mwanaha mo. Na kile a nitifalisa kuli mwanako ya silimo ya cwale ye, Likolo la habo lita tateka ni kubona kuli kuyahiwa limbule ze tokwahala kamukana, hala zona mandu ni maofesi sakata kwamiseto. Nghidinwa na patalalize kuli pene ye likana N$65 million ita fiwa Liluko la Likolo la habo leli bona za lin`olisa la sicaba. Na kile a tazeleza kuli Liluko li bona za lin`olisa kamukana. Na bulezi kuli pene ita itusiswa hahulu mwakubona kuli lin`olisa ze cwale kaza sipepo, manyalo ni mafu li beiwa mwakopyuta. Na tazelize hape kuli mungendenge o uta tusa luli. Mwamanzwi ahe, na kile a tiseza hape kuli, lisebelezo kwaLikolo la habo lita tiya luli. Likwambuyu u lumela kuli kambe buka tuna ya linolisa la sicaba sa naha nese beilwe kale mwamufuta kaufeela wa kompyuta, kambe ne konwa kutalimwa ka zazi ni kunuha palo za sicaba sa naha ka kutalima limbututu ze pepwa, manyalo, ni mafu kubeya lilimo za sicaba sa naha kaufeela. Na kile a tumusa kuli mwasilimo se sifelile, Likolo la habo neli kile la bona palo ye likana 1,5 million ya batu bene ba kile ba kena mwanaha kubeya 1,4 ya batu bene ba kile ba siya naha hape kuzwa kweli yale ya Lungu kuto isa mwakweli ya Liatamani silimo se. Na bulezi kuli mwanako ya poto kaufeela ya sicaba se mwanaha, mikwakwa nenze patehile luli, ni kutisa litokwahalo za lisebeliso sakata za kupima lipalo ze kwaLikolo la hae. Ka yona palo kaufeela ye, Likolo neli kile la lumela palo ye likana 1 653 ya mazwahule bene bali mwanaha isi ka mulao kasamulao wa kufumana maata a kueza cwalo. Na ekelize kuli nihaike ze ki zene kile za ezahala, pene ye likana N$69 million ne kilwe ya fumanwa mwalinzila za lukao ka libaka za litifo za fa miseto ya naha mi ne ku kilwe kwakutelwa kutelwa han`ata kuli kuzwisezapili lisebeliso ni lisebelezo kwamiseto ki kwabutokwa. Na kile a tumusa hape kuli, ni haike musulo ono kilwe wa fiwa neli N$90 million, kuluza neli feela N$20 million mi kacwalo Likwambuyu una ni sepo ya kuli mwabukamuso muta lika kaufeela zene kilwe za kupwa li beiwa hande mwamazoho sakata, Likolo la habo lita kona kuba ni kutulo sakata kwamusulo kaufeela ota fiwa.