OSHIKANGO – Muinasipula wa katengo kandu ya milao kakabona za litaba za kwande, silelezo ni buiketo, Lebbius Tobias, naize tokwahalo ya maino, liofesi ni linzila ki lika ze zibahala zeo babeleki ba kwamiseto mwanaha kaufela batalimani ni zona. Nabulezi zeo mwangambolo ni Nampa kanako yeo katengo nekapotezi museto wa Namibia ni Angola wa Oshikango, mwasikiliti sa Ohangwena. Naize hala butata bobatalimani ni bona ki kutokwa mezi akenile, maboni asilelezo, liapalo za musebezi, kusa huliswa famusebezi, kutokwa lukwakwa ni kutitihana kwa museto. 

“Babeleki ba kwa museto baeza musebezi omutuna, lwa itumela kwakusebeza katata kutaleleza misebezi yebafilwe, mi ni bata kutiseza kuli batokwa kutelezwa kuli butata bwa bona butatululwe,” nekubulezi Tobias. Naize muuso uyahile miyaho ye tokwahala kwa miseto, mi maluko alukela aswanela kubona kuli litokwahalo za babeleki zatalimwa. Babeleki ba kwa Oshikango neba bulelezi katengo kuli kusabateñi kwalika zecwale ka mululwani obonahala hande, limotikala za musebezi ni miyaho sakata, kusitatalisa musebezi wa bona.

Neba supile kusabateñi kwaofesi yebona za limotikala zelonga libyana kuba butata bo butuna, hala kuzamaisa bakwaezi balimotikala zelonga libyana babazwa ni kukena mwanaha Namibia ni Angola, kuisa libyana zabutokwa hala kulwanisa butuku bwa lifasi loote bwa Covid-19. “Kulatelela poto ye ni katalima mukwa omuñwi kutalima butata bo, kaku ñolela babusisi balikiliti ni baokameli batutengo twa likiliti kuamana ni zelufumani, ni kubakupa kuli butata bo butalimwe sihulu mwalikiliti,” nekubulezi Tobias. Naize uka kandekisana ni maluko alukela kuli butata butatululwe kapili. Katengo kukala la 6 Sikulu neka potezi likiliti zecwale ka Otjozondjupa, Kavango ya Upa ni Wiko, Zambezi ni Ohangwena, mi kakazwelapili kupotela likiliti zeñwi ili Omusati, Kunene ni Omaheke.

– Nampa