KATIMA MULILO – Muokameli wa tolopo (Mayor) ya Katima Mulilo u latuzi litaba za kuhapelezwa kuli katengo katolopo kapalezwi kubakanya mibu ya mayahelo yeo musulo wa yona wa mali nabakanyizwe kale kiyo na yolilwe.
Na alabela kwa maikuto a nabonahezi mwa mutende, kakuhapeleza katengo katolopo kuli kakonile kusinya-sinya mali ao nalelezwi lizwelopili ni kubakanya mayahelo a bayahi. Matengu u supile muňoli wa katilotilo kaneka bonahezi biki yefelile la butanu mwa mutende kuyaulula sichaba, ni kuli mingendenge ya zwelopili ni kubakanya mayahelo lisweli kuzwelapili.
“Katengo ka One Lux Development misebezi ya kona neli kuchincha mayemo a bonaikahela kuba mwa mayemo sakata (bukuwa) kono nekapalezwi kufeza misebezi yeo nako yekafulala mwahali a silimo sa 2011. Kacwalo luna lusimululezi foo basiyezi teni,” a talusa. Na ama kwa katengo ka lizwelopili kao misebezi yakona yaku fetula bonaikaheka kuli babe mwa mayemo sakata , kao misebezi ya kona neyemi mwa 2011. “Silimo sesifelile, lutatekile kubeya mipila nili pompi za mezi mwa libaka za bonaikahela. Musebzi u tabe u felile ona fa, mi luyepile liliba zetalu mwa libaka za bonaikahela kumbweshafaza liteko za mezi ze pahami kwa bayahi,” a talusa. Kuamana ni libaka za mayahelo, Matengu u ize, musebezi wa kualuhanya mubu wa mayahelo u petahezi, mi u talusize palo ya mayahelo amanca a lelilwe, kunolofaza butata bwa mubu wa mayahelo mwa Katima Mulilo. Libaka za mayahelo kwa mukulela wa nuka li aluhanyizwe-aluhanyizwe. Lulumezi kubakanya libaka za mayahelo ze fitelela mianda yemilalu (300) mwa choto, mianda ye mibeli ni mashumi a mane (240) mukulela wa mukwakwa wa Ngoma, mianda ye lobapeli ni mashumi a mane ni a ketalizoho (845) mabapa ni matotaeti a Katima, kusinganyekwa mayahelo a mianda ye milalu (300) mwa hali a Choto ni mafuta, kubeya mayahelo a fitelela mianda ye silezi ni mashumi a ketalizoho (650) mabaapa ni NHE. Lu patehile ni misebezi mi batu batokolomohe kuzamaya babulelela babamwi litaba za mbwashula,” kwa talusa Matengu ya na bonahala kufela pilu. Na supelize mubihi mukoloko wa milelo ya katengo ka tolopo yeo i bupa milelotuna ya tolopo. Yemimwi kuyona ki kuyaha sinca muyaho wa tolopo wa mali afita fa N$12 million, kuyaha sibaka kokuya zemaswe mwa sibaka sa bonaikahela sa Choto, mandu a mianda ye milalu ni mashumi a mabeli ka mandu a supile (326) a bupa milelo ya mungendeke wa mandu a maňataňata (Mass housing Scheme and project) ni simbule sa kukenisa mezi mwa libaka za bonaikahela.
Kakuya ka Matengu, tolopo i chinchize kuibapanya ni sapili. “Sibupeho sa Katima Mulilo sichincize ni kuba ni mayemo sakata kuzwa 2011. Lu sinyehezwi N$20 million kubeya taala mukwakwa wa Dr Sam Nujoma Road ni kuchanfaza mukwakwa wa sipatela. Mikwakwa ye mimwi mwa Boma ni Ngweze ni yona i beyilwe taala,” kwa bulela Matengu. U Konile kumema muňoli wa maikuto yoo kuzwela kwa mikopano ya Katengo ka Tolopo ili koo ki sichaba sikona kufumana tatululo kwa maikuto a sona. “Neni tumusize kuli, mikopano ya luna i atamezi sichaba, kusina kutalima mayemo a mutu. Yomumwi ni yomumwi u fiiwa sibaka sakufitisa maikuto kusina sabo. Katengo kakabupiwa ki bona bayemeli ba sichaba (Councilor) ki kona kakaketa ni kunyatela milelo ya zwelopili isi muokameli wa tolopo (mayor). Tumelelano ya babaňata kaza milelo ki yeo inga sibaka,” kwa talusa Matengu. Mwa liňolo lenelibonahezi mwa mutende, muňoli u talusize kuli bayemeli ba sicahaba ba ba siile (councilor) neba kungulezi musulo wa mali kwa tuko a kubakanyisa mayahelo a mwa likalulo-kalulo, za bao mayemo a bona ali kwa tasi, fahali-hali mane ni bao ili limbombo.