WINDHOEK
Ombuto nomukithi goHIV/Aids sho tagu tsikile nokuhepeka oshigwana, ompumbwe yomayakulo oshowo ooprojeka ngaashi dhoka dhehungomwenyo, eikonakonitho, esiloshisho, eyambidhidho nesiloshimpwiyu lyomomagumbo oya dhiginina noonkondo, osho ongundu ndjoka yi lile po omauwanawa gaantu mboka ye na ombuto yoHIV tayi ti.
Komahangano ogendji ngoka inaga yama kepangelo ye nasha noHIV/AIDS moshilongo, shika osha ninga omukundu omunene omolwompumbwe yoonzo dhopashimaliwa dhoka inadhi gwana.
Oku shi talela mushika, ogendji gomomahangano ngoka ngashingeyi ohagi imanga kumwe nookampani oshowo omahangano gepangelo nogopaumwene opo ga mone uuhupilo nokukaleka po omakwatathano ngaka gethimbo ele.
Pamukalo nguka Namibia ota vulu okushunitha pevi onkalo yoHIV. Omasiku ga zi ko, ehangano lyopashigwana lyaantu mboka taya lumbu noHIV/Aids lyedhina Lironga Eparu olya yakulile omagano gokapandi koodola N$7500 kokampani Holcim Namibia. Kakele koshimaliwa shika, oya pewa ishewe iipakete ihamano yomahini gomomakende ngoka ga nuninwa okupewa oomeme haya yamutha mboka ye na ombuto yoHIV. Mokugandja otjeke, omukuluntuwiliki goHolcim Namibia, Johan Burger, ota ti nonando omagano ngaka oga gandjwa koHolcim, oshi li eyambidhidho lyopamuhanga kaaniilonga yehangano lyoHolcim Namibia. Onkalo yoHIV/Aids ngashingeyi sho ya thikama poopelesenda 19.9, oonkambadhala dhopamuhanga odha pumbiwa okukandeka uupyakadhi mbuka.
“Ekondjitho lyomukithi nguka kali shi okweethelwa miikaha yepangelo nenge omahangano goHIV/AIDS. Oshoka ogu li eshongo enene pankalathano nopaliko, onkee osha simana atuheni tu hanganeni ongoshigwana okulwitha omukithi nguka,” Burger ta ti.
Lironga Eparu, shoka tashi ti “okwiilonga omukalo gokwiihupitha” ehangano ndyoka lya totelwe po momumvo 1999 kongundu yAanamibia mboka ye na olune mboka taya lumbu noHIV/AIDS. Kakele kokuyambula po ongushu yoonkalamwenyo dhaantu mboka taya lumbu noHIV/Aids, ehangano ndika otali lalakanene wo okugandja ontseyo nomaunongo kaakwashigwana okukondjitha omahepeko nokatongotongo haka ningilwa iilyo yawo. Oshowo okupashula oshigwana shi koneke nokukwatha moompumbwe nomauwanawa gaantu taya lumbu nombuto nomukithi nguka.
Mokutaamba ko omagano ngaka, omukuluntuwiliki gOoproholama dhOwina mUuministeli wUundjolowele nIilonga yOnkalonawa, Ella Shihepo ota ti oshishi okupandulwa okumona iizemo yomakwatathano neitulomo lyiikondo yopaumwene okugandja eyambidhidho koonkambadhala dhokukondjitha oAids moshilongo.
“Omayakulo goHIV/AIDS, esiloshisho neyambidhidho oshi li oshinima shoka shi na ondilo noonkondo shoka itashi vulu okweethelwa ashike shi gwanithwe po kepangelo olyo awike. Onkee otwa pumbwa okukumika oshigwana nomakwatathano niikondo yopaumwene opo yi kwathele moonkambadhala dhetu,” Shihepo ta ti.
Okwiindile wo omahangano galwe gopaumwene ga kuthe ko oshiholelwa shaHolcim Namibia, nokukumika Lironga Eparu a shilipaleke kutya iimaliwa mbika oya longithwa muuwanawa wiilyo yehangano. Mokuholola olupandu lwe, omunambelewa omukuluntu gwaLironga Eparu, Emma Tuahepa, ota ti omagano ngaka oge ya pethimbo lyo opala, notaga ka longithwa okuyambula po oonkalamwenyo dhaantu mboka taya lumbu noHIV/Aids.
“Nomagano ngaka, Lironga Eparu okwa kwatakana naHolcim Namibia, ngoka a li nehalo okugandja omagano. Shika oshi li lela onkatu ompe yomakwatathano getu noshi li wo etameko ewanawa lyomakwatathano gomonakuyiwa,” Tuahepa ta ti.