WINDHOEK – Muyahi wa naha Zambia yo sapili na atulezwi mulatu wa bulengwami bwa likomu mwa khuta ye pahami ya sikiliti mwa Katima Mulilo, kupo ya hae yakuli taba ya hae i kutele mwa khuta ye pahami ne i palile kuamuhelwa la Mubulo.
Simataa Simataa na fitisize kupo ya pundululo ya mulatu wa na lengilwe wa lilimo ze silezi mwa tolongo, mwa khuta ya sikiliti ya Katima Mulilo ka kuuzwa likomu ze talu mwa 2011. Na fitisize kupo ya kuli taba ya hae i talimwe sinca mwa kuta ye pahami kuamana ni buima bwa koto feela kwateni. Muzekisi wa muuso ya chilaukile mwa mulao (State Advocate) Jack Eixab, na taluselize khuta kuli akuna mabaka a utwahala a filwe kuli taba a ikutela ki sikamani, ka kulatelela milao ye filwe mwa Magistrate Court Rules, kapa kusupa mafosisa a muatuli wa taba sapili, kamukwa o cwalo baatuli ba linonge (Appeal Judges) Hoff ni Naomi ba laela kuli kupo yeo izwisiwe fa mukoloko wa litaba zemwi.
Eixab hape nabile ni butata kwa kupo ya hae kalibaka lakuli neifitisizwe kakuliyeha. Na ize, Simataa na atuzwi kala 5 Sukulu 2011 kono na fitisize kupo ya hae ya pundululo kala 21 Yenda 2013, ka tiyeho luli. Simataa naikupela kuli kambe nafilwe mulatu wa kulifa mali kalibaka lakuli ki mukuli wa pilu hape u una ni bana ba ketalizoho bao u swanela kuuta. Hape u zwezipili kutalusa kuli na safokola, kacwalo na hupula kuzwela pili ni tuto ya hae ya sikolo. Muatuli wa kuta ye pahami (Judge ) Hoff yo na ǹozi katulo ye lumelelana ni ya muatuali wa kuta ye pahami (Judge) Naomi, na ize, mabaka a kufitisa kupo ya kuli taba i kutele a swanela ku utwahala ni ku namalala,” ”mi kabaka lakuli akuna hande mabaka sakata, taluso ki kuli akuna bupaki bobulwanisana ni katulo, kacwalo akuna pilaelo ye fitisizwe kuamana ni katulo. Kalibaka lelicwalo taba i swanelwa kuzwiswa fa mukoloko, muatuli wa khuta ye pahami a tiseza.”
Kuamana ni taba ya kuli kupo ya hae neifitisizwe kakuliyeha, Judge Hoff u ize, Simataa na fitisize kupo ya hae kakuliyeha ka kutalusa kuli na sina zibo ya kuli kupo ya kuli taba ikonwa kukupiwa kuli i talimwe sinca kwa khuta ye pahami, libuka za khuta lisupeza kuli litukelo za hae kuamana ni kufitisa kupo na litaluselizwe ni kuli na itumelezi kuli na utwisisize.
Kuamana ni muatuli wa khuta ye pahami (Judge) Hoff, libaka lakuli bupaki bwa simataa fa pili a mulao na ize, na siile lika kaufela mwa mazoho a mulimu, seo ki sisupo sakuli na itumelezi koto. U ize haboni mukwa wo kupo ya hae i kona kuamuhelwa kayona.