KAKUYA ka tekulo ya Likolo la Milafo ni Maata ya kuekeza kwateko ya mafula a oli ka n`ambekelo ye likana 21 cents ka singumbuli sili sin`wi yona 1 litre mwamazazi a felile, bakwaezi ba limbayambaya hamohocwalo ni bazamayi habana kuutwa ‘butuku’ mwanako ya cwale hakuamwa za kekezo ya litifo za bona za misipili kakuli litifo kaufeela mwanako ya cwale lita yema chimo. “Litifo ha lina kuswaliwa. Lunze lu talimezi likezahalo kaufeela kakuli lu sana ni sepo ya kuli kekezo ye I kona kuba feela ya nako ye kuswani,” Mueteleli wa katengo ka Namibia Bus and Taxi Association (Nabta), mutompehi Magnus Nangombe na kile a taluseza ba mutende o. Litifo za mwahala tolopo sihulu mwamulenen`i wa Windhoek lita yema feela fa yona pene ye likana N$6.50 ha misipili ye mitelele ye cwale kaya kuzwa mwamulenen`i wa Windhoek ni kuliba tolopo ya Katima Mulilo lita yema fa N$230 sina kamita. Litifo za kuzwa tolopo ya Oshakati ni kuliba Windhoek ni zona lita yema fa N$115 kwasicaba se si itusisa hahulu limbayambaya ze tuna ze cwale ka ma-bus. Ye ki kekezo ya bubeli mwalikweli ze sika ba kale ze peli. Mwakweli ya Lungu silimo se, teko ya mafula a swana ne kile ya pahama ka N$50 cents ka singumbuli sili sin`wi. Licaziba za sifumu za naha li talusa kuli teko ya mafula a oli I susuezwangwa hahulu ki maemo a shilin`i ya naha south Africa yona Rand yena ni buima bobu swana ni shilin`i ya naha ye, ka kubulela kuli Rand I kutelanga hahulu fafasi ha ibapanywa ni shilin`I ya US ye taluswa kuli I nopanga buima mwalinzila ze shelana mwalikweli ze sikai feela. Ba Likolo la Milafo neba kile ba fitisa mamela kwabayahi kaufeela ba naha kuli ba itukiseze kuyema maefe-efe mwaliteko za mafula a swana a, baken`i sa kuli musika wa lifasi wa mafula a swana u yemi mafulo. Yo muhulu wa Likulo le lin`wi kwakampani ya RMB Asset Management Namibia, mutompehi Martin Mwinga na kile a toloka kuli kekezo ya mafula a oli I kona kuba ni maemo maswe mwaliteko za libyana zen`wi. Nihaike ba Liluko la Misipili kapa Linzila, bona ba yema ka manzwi a bona a kuli litifo za bona ha lina kupahama, Mwinga yena u yunga toho ya hae ka kutalima kamo Liluko lita konela kuswala kekezo ye ka nako ye kuma kai. Ka kekezo ye, Mwinga u lumela kuli n`ambekelo ya fahalimu ya libyana kapa lisebeliso zen`wi ita pahama ni yona mwalinzila ze shelana.