KATIMA MULILO – Baana ba ba beli neba hatikezwi ki litou viki yefelile. Yen’wi ya litou nenyatezwi kuli ya kataza, mi lin’olo lakuli ibulaiwe neli filwe.
“Lin’olo la kuzuma tou neli filwe kutusa sicaba, bao bupilo bwa bona butaselizwe ki lisinyehelo zetiswa ki litou. Nyandi nafumanehanga nako kaufela likolo hane li mutokwa, sihulu mwakutalima likomano mwahala batu ni lifolofolo,” nekubulezi sibuabui walikolo la silalanda, Romeo Muyunda.
Muuna walilimo zemashumi amane kazesilezi natimezi kulatelela kolofalo yakutasezwa ki tou Lamubulo mwasilalanda sa Ngoma, mwasikiliti sa Zambezi. Nyandi nazibahalizwe kuba Kapule Albert Kawayire kuzwelela kwa Ngoma.
Mwakezahalo ye shelana ni yeo Lamubulo, muuna walilimo zemashumi amane kazesilezi Gert van der Walt nahatikezwi ki tou yene kataza kwa munganda wa Kambangula mwa silalanda sa Tsandi, mwasikiliti sa Omusati, Lamubulo musihali.
Neli muzumi yana sepilwe, yana filwe man’olo akuzuma mwalibaka zapabalelo ya lifolofolo mwa likiliti za Kunene, Omusati, ni Oshikoto. Emmanuel Koro, mubihi wamakande yapila mwatolopo ya Johannesburg, yan’ola makande alilalanda ni zwelopili mwa Afirika naize, “Kibumai kuli baana ba ba beli neba hatikezwi haisi lifu ki litou mwa Namibia. Kusupeza hape, kuekezeha mwahala likomano zabatu ni lifolofolo, palo ya litou mwa Namibia haizwelapili kuhula.
Likolo la silalanda ni mishitu neli fitisize manzwi amatomolapilu kwamabasi abaana ba ba beli. Muetapili mwalikolo la silalanda Leeverty Muyoba naize, piho nefumanwi kwa Salambala Lamubulo kuli mutu nataselizwe ki tou, mi naholofezi hahulu. Membala walubasi lwa yana timezi, yana salati kutungululwa, naize likomano ni lifolofolo liatile kwamukulela wanuka ya Chobe. Nabilaezi kuli litou ni litau zakataza baken’isa kuli nuka ya Chobe iomile.
“Muhabona nazamaya anosi, mi afumana sikwata sa litou. Yene ina ni mwana yamutakalala ni manaka ayona mwamba kanako ya 11h00 Lamubulo kakusasa. Neluli fasibaka sa kezahalelo, nemupazuhi mba ni lunaka. Nahohobezi mwamushitu, mi afita kwamukwakwanyana. Nakatezi konji hafumaniwa kimutu yana fita kanako ya 15h00. Abulelela yana fita kuli nataselizwe ki tou, pili asikashwa kale,” nekubulezi membala walubasi.
Nabilaezi hape kuli Ngoma ilatehezwi kibatu ba ba n’ata mwalilimo zefelile baken’isa litou. “Sikwata sa babeleki kuzwelela Katima Mulilo nesi alabezi kabunako kwa piho, mi nesi ile kuyo bona kwateni. Kamaniti kwayo nyatelwa kuli tou neholofalize mutu. Nafumanwi kanako ya 15h00 apila ki Mulatehi Richard Simwanza.
Simwanza ayo kupa tuso kwa munzi oli bukaufi. Habakuta bafumana nyandi ashwile,” nekubulezi Muyoba.