Charles Ndeumane
Omunashipundi gwehangano lyuupale woondhila moNamibia lyoNamibia Airport Company (NAC) omundohotola Leake Hangala okwa ti otaya ka tunga okapale koondhila kopaigwana mondoolopa yaLuderitz.
Hangala ngoka eli wo omanashipundi melelo lyoNamibia Univeraity of Science and Technology (NUST) okwa popi ndhoka petulomiilonga lyoshitayi shaNUST moLuderitz uunambo.
Pakutala kehumokomeho oshowo emoniko lyoonzo dhopaushitwe dha yooloka moNamibia ngaashi omahooli noGreen Hydrogen, oondoolopa dhokomunkulofuta mwa kwatelwa Luderitz odha inekelwa tadhi ka dhana onkandangala moku kwatela komeho iipambele yongeshefa yi na sha noonzo ndhoka, ehumokomeho oshowo maendathano.
“Onga omunashipundi gwoNAC otwa ninga nale etokolo kutya ota tu ka tunga okapale koondhila kopaigwana moLuderitz oshoka ngele aaposhiyoni taya zi moombautu noosikepa ya ningamo nenge omwedhi nenge mbali taya zi koChina nenge koBrazil kayena ethimbo lyokuya koWindhoek. Oya hala oku kala moLuderitz ndele etaya tuka noondhila okuza muka ngele taya shuna kiilongo yawo,” Hangala ta ti.
“Ondoolopa yaLuderitz oya kala noku longelakumwe nomahangano ga yooloka kutya nee ogopaigwana nenge ogomoshilongo. Oya longa nomahangano omanene ngaashi NAMDEB, DEBMARINE, Scorpion Zink, oshowo omahangano goohi,” Hangala tati.
Hangala okwa ti ngaashi naanaa Aaraba ya longitha oonzo dhawo dhomahooli okuninga Dubai ehala lyethikilo lyaapashiyoni aakwiilongo, Namibia naye nakutheko oshiholelwa eta longitha nawa oonzo dhe aningepo ondoolopa yaLuderitz ehala lyethikilo lyaapashiyoni.