Rudolf Gaiseb

Mueteli wakopano ya NDP Martin Lukato ubata tumelano ya museto mwahala Namibia ni Botswana ya silimo sa 2018 kufeliswa. Mwasilimo sa 2018, nyandi mueteleli wanaha Hage Geingob ni muetapili sapili wanaha Botswana Ian Khama, neba nyatezi tumelelano ya kwa museto, yene nitifaza tumelano ya kale ni kuyandulula hande museto mwahala linaha zepeli.

Kono bayahi banaha Namibia ba ba pila kwa mukulo wanuka ya Chobe ni Kwando mwalilimo zefelile ba bilaezi ka ku kubyaniswa ki masole banaha Botswana. Bayahi banaha Namibia ba 37 neba kunupilwe kimasole banaha Botswana kalikalezo zakuli neli bazumi isi kamulao.

“Nilumela kuli keto kaufela yaku cinca milao ya miseto iswanela kuba tumelano ya bayahi kaufela mwanaha Namibia, sihulu bale babapila kwa mukulela wamuseto. Iswanela kuba batu kaufela, kungelela cwalo ni likeleke, lipolitiki ni baeteleli ba sizo hamoho cwalo ni sicaba. Kona mokuswanela kubela. Hamukoni kushimbulula mubu kuzwisa mwanaha yeñwi kusina tumelelano ni bao babapila teñi,” nabulezi.

Lukato nabulela kwa mukopano ni bamakande mwa Windoko, kwana ilo zibahaza kuli NDP ika patalaza pampili ya mulelo walisepiso za sicaba la 15 Muimunene. “Kuswana inge ku uzweza mutu yomuñwi mubu. Kikacwalo mubuso wakacenu, Swapo ni mubuso wa Botswana, neba uzwelize sicaba sa sikiliti sa Zambezi. Kacwalo, tumelelano yeo nesiyo hande, iswanela kufeliswa,” nabulezi. Tumelelan ne nyatezwi mwalilimo zelatelela 1990 kasamulaho naha Namibia iluza muzeko ni naha Botswana hala sioli sa Kasikili/Sedudu. Namibia nenyatezi kutambeka sioli kwanaha Botswana.