Minista woundjolowele Dr Esperance Luvindao okwa ka kwashilipaleka nokuninga omapekapeko shi na sha nonghalo yomanyatu moshitukulwa shaMaheke. 

Oshitukulwa shaMaheke osho shimwe hashi kala sha dengwa kondjala, nohashi kala yo shi na ounona va kwatwa komanyutu molwoikulya oyo hai kala ihe po, osho yo oshikukuta osho hashi kala she lihanena oshitukulwa. Ouyelele wa dja kombonge yangoloneya moshitukulwa owa holola kutya, Luvindao okwa talela po oshipangelo shakula shepangelo moGobabis, omo a ninga yo omapekapeko nghee ovapangi tave shi endifa, osho yo oku va pa omhito yokuholola eemhumbwe davo, ye minista e ke ditule moilonga. 

“Neudo ohandi ka kala nde lipyakidila noshilongo ashishe handi talele po oipangelo yepangelo, shi na sha noshikumungu shomanyutu, osho yo okupekapeka noku konakona omaupyakadi aa haa kala a taalewa koipangelo efiku nefiku,” ta ti. 

Okwa twikila kutya natango ota fi yo oshisho shokutatela po eembelewa doongoloneya moitukulwa, naadi da pamba epangelo, ye a pwilikine nokutula eemhumbwe davo moilonga. 

Luvindao okwa yandja yo olupandu laye kovapangi moshilongo ashishe koonono, eshi have lipake mo moilonga yavo, naashi yo hava file ovanaudu ava hava kala ve na omukifi womanyatu oshisho fiyo tave ya kondjila. 

Okwa ti ota ka tula yo moilonga oilongifo osho yo oikwa noipangifo yepangelo ei ya mona oixuna i kale ya pangelwa noya tulwa peendodo apa tai dulu okukala ya longifwa nokukwafa vali oshiwana. 

-taimihaihambo2000@gmail.com