Auleria Wakudumo
ONGWEDIVA – Nonande oondohotola ovali vemu pa ashike oivike iheyali oku kala nomwenyo, Lameck Mwanyangapo okwa mona efilonghenda loku kala nomwenyo eshi a finda nokwaveluka komukifi omudipai wokaangela.
Mwanyangapo okwa li a katuka onghatu yakula mokulwifa okankela nopaife okwa hala a kwafele yo oihakanwa ikwao yomukifi ou tashi pitile mehangano olo a tota loku kwava itava dulu okulikwafa voovene.
Mwanyangapo okwa holola mefiku12 lokudimbuluka okaangela moshipangelo shopaumwene mOngwediva Medipark Olomakaya kutya okwa monika exwata lokaangela hali ifanwa Myeloma mo2023, osho ta ti osha lundulula onghalamwenyo yaye mokushuuda.
Efimbo olo, Mwanyangapo okwa hokolola ta ti okaangela vati oyali tai li hanene oilyo yolutu, mwa kwatelwa ouluvi, omakipa oshoyo oilyo imwe ya wedwa po.
“Nande ongaho, Kalunga omufindani. Ngeenge efimbo loye inali fika, ito xulifa. Eendokotola oda duluka po omangela yokupanga. Onda tulwa tete koprograma yoradiation oule womafiku 30, oyo yaka landulwa ko chemotherapy,” Mwanyangapo ta ti.
Konima eshi a mona epango eli, vati oshitumba osha hanaunwa po filu, omakipa aye okwa tameka okuya kondjila naishe oya enda nawa konima yokupitila meenghatu da yooloka okupanga okaangela.
Mwanyangapo okwati okwa fiyapo oshilongo a ka pangwa koSouth Africa onga omunaudu muOctoba odula ya djako nokwa alukila keumbo onga muJanuary onga omufindi wokaangela, oilonga oyo tei pangulile Kalunga.
“Elunduluko longhalamwenyo yange moule wokafimbo ola etelange opo ndi talulule omalalakano onghalamwenyo yange nonda tokola opo ndi ninge eyooloko meenghalamwenyo davahapu tava lumbu nokaangela,” Mwanyangapo ta ti.
Mwanyangapo oha ndana onghandangala okukwafela nokutwa omukumo ovo tava lwifa okaangela heshi ningi okupitila mo “Lamech Mwanyangapo Cancer Foundation.”
“Okaangela omukifi ngaashi ashike omikifi dikwao nohau dulu okupangwa ngeenge wa monenwa po. Onghene keshe umwe nakale hayi koshipangelo aka konaakonwe,” Mwanyengapo kumaida.
odula ei, edimbuluko lokaangela olili koshi yoshipalanyole “close the care gap: everyone deserves access to cancer care.