Aanona oshowo omukiintu nomulumentu mboka haya zi megumbo lyimwe momukunda Omutwewomunhu moshitopolwa shaShaHangwena, oya ningi aanelago sho ya li ya kala mekwatathano nomboma.
Otaku hokololwa kutya aanona oya kala taya dhana omboma ndjoka iiwike ya pita pu itatu, ihe okwa li ya ningi aanelago sho inaaya topelwa.
Omugandji gwomauyelele moshitopolwa shaHangwena Abner Kaume Itumba okwa ti, aakalimo yomegumbo moka otaya hambelele Kalunga oshoka ngeno okwa li oboma ndjoka ya topa ngeno egumbo alihe olya pi po.
“Aanona okwa li ya toola oboma ndjoka miihwa, noya li ya yi nayo sigo okegumbo, taya fekele kutya oshidhanaukitho shoka ya kala taya dhana nasho omasiku ogendji,” ta hokolola ngaaka. Ta ti, aakuluntu yomegumbo moka okwa li ya mono omboma ndjoka ihe kakwa li ye shi kutya oshike, omanga omukiintu gumwe nomulumentu gumwe okwa li ya kuutumba ko omasiku ga yooloka.
“Ndyoka okwa li ashike elago, notaku pandulwa omulumentu ngoka a li a dhimbulula kutya shoka tashi dhanwa kaanona omboma, nokwa li a tseyithile opolisi mendeelelo,” ta ti ngaaka.
Itumba ta ti, oboma ndjoka okwa li ya tegululwawa kopolisi noku yi topitha ethimbo ndyoka ya monika.
“Ooboma omo dhi li natango odhindji momakuti, nkene dha thigilwe mo ethimbo lyiita, nonando opwa piti omimvo ondhindjindindji,” ta popi ngaaka.
Ta kumagidha oshigwana shi kale tashi ikaleke kokule niitenda kaye na ontseyo yayo oshoka oomboma natango omo dhi li mokati ketu.– vkaapanda@nepc.com.na