Opolisi mOshakati oya manga po aalumentu yatatu mboka taya fekelwa moshiningwanima shomunyeka shoka sha ningilwa omulumentu nomukulukadhi gwe mboka ye li aakwashigwana yaAngola.
Omunyeka nguka okwa li gwa ningwa koongulasha dhOsoondaha pehala lyi na oondunda hapu ithanwa Mbishi Flats mOshakati.
Mboka taku fekelwa kutya aafuthi ya kwatwa, oye na omimvo, 33, 37 nagumwe 44. Oya li ya adhika molukanda talu ithanwa Eenhokele mOshakati moka ya li wo ya adhika nondjembo yombistoli, neshina lyojackpot ndjoka nalyo taku fekelwa kutya olya yakwa.
Opolisi otayi hokolola nkene aalumentu mbaka ya thiminike noku iteyela mondunda moka mwa li mwa lala omusamene gwomunangeshefa Nuno Taborda Rodriguez Cecar (53) nomukulukadhi gwe Leopordina Imaculada Cecar (49) mboka ya yambukile koshitoplwa shaBenguel moAngola. OoCecar okwa li owala ye ya okutalela po yina yomusamane ngoka e li moNamibia ta mono epango.
Aafuthi mbaka anuwa sho ya teya po omweelo oya yeke aahokanathani mboka iimaliwa koomuma oN$40 000, oshowo oo Kwanza dhaAngola10 000 noongodhi ndatu dhoTenco Spark adhihe kumwe ndhi na ongushu yoN$7800.
Opolisi oya ti oonakuninga iihakanwa yomunyeka oya ehamekwa niitenda, omusamane okomutse, nomukulukandhi omepepe.
Aafekelwa anuwa oya kala nale taya kongwa kopolisi shinasha neteyo lyomagumbo nomunyeka moshitopolwa shaShana.
Inspector Thomas Aiyambo gwopolisi yaShana oye a gandja uuyelele mbuka.