Aantu ye li 15 oya hulitha, 530 oya tambulilwa moombete, omanga ye li 6, 147 ya pangwa kiipangelo moshilongo ashihe hoka ya monika ye na omukithi gwomalaria.
Omiyalu ndhika dha lopotwa pokati kaJanuali naMaalitsa odha gandjwa kOminista yuuhaku nonkalonawa Kalumbi Shangula mesiku lyuundjolowele, Omaandaha gomasiku 8 gaApilili, ndyoka lya dhimbulukilwa koRundu moshitopolwa shaKavango East.
Esiku lyuundjolowele nuumvo olya dhimbulukiwa kohi yoshipalanyolo “Uundjolowele wandje, Uuthemba wandje”.
“Omwaalu gomaso osho wo gwaantu ya kwatelwa moombete ogwa indjipalwa lwaali okuyelekathana nomwaalu gomumvo gwa zi ko, pethimbo lya faathana,’’ ta ti ngaaka.
Shangula okwa totha mo kutya omumvo gwa yi aantu yahamano oya hulitha omolwamalaria omanga ye li 287 ya kwatelwa moombete.
Ta ti, omwaalu gonuumvo otagu limbililike, onkene oya pumbwa okuya po nomilandu dhimwepo ya shunithe pevi nenge ya sinde malaria.
“MoNamibia malaria oha holoka unene miitopolwa ngaashi Kavango East, Kavango West, Ohangwena, Zambezi, Omusati, Oshana, Kunene, Oshikoto, Omaheke, oshowo Otjozondjupa,” Shangula ta ti ngaaka.
Minista okwa kumagidha oshigwana shi kale aluhe tashi kongo uuhaku kuyele uuna ya mono omandhindhiliko gomalaria.
Ta ti, omandhindhiliko gamwe taga ulike kutya omuntu oku na Malaria ongaashi omasipa taga tende, omutse tagu ehama, etelele, oshowo onkungo.
“Natu kambandhale okuyanda omaso taga etwa kumalaria.
Natu longitheni oompito adhihe okukeelela malaria, ngaashi okutsinina omalukalwa getu, okwiizaleka omizalo dha siikila omalutu getu nawa, okuteta po oomwiindhi dhi li popepi nomagumbo oshowo okulala moonete dhokukeelela oomwe,” Minista ta kumagidha ngaaka.
-vkaapanda@nepc.com.na