ǀAEǁGAMS – ǂUrusib tsî ǀHûhâsib !Oabadi di Ministeri, Dr Kalumbi Shangulab ge ra mî, malarias noxopa ǁîs hoan xa a kai ǂurusib !gomsise Namibiab ǂurusib !âba ībasa, !gōsase ǀawas tsî aiǂoas !âgu !hūb digu !nâ. ǁNāpab ge ǂoago wekheb Donertaxtsēs di ǂurusib !hoaǁaredi ǀgamǁî ǀhaos hîa wekheba nî hâsa !khōdana hâ i soab aib ge ministera ge mî, hoa!nâ-aixa ǁgūbas nē ministris dis, ǁkhaubas ǁaupexa 1.9 miljun Namiabiaǁînas !aorosasib nē ǁōs hîa ǀûitsiga xu ra hâs !oa-aisa. Nēs hâ, xawes ge 2022ǁî kurib !nâ malarias khoraǂuisensa !kham!oasa a dana ǀaweǁguib !nâ, Dr Shangalab ra mîsa !oa. Nausas mûmûsa ǀorosiba malarias xa ǀaes tamas ka io ǁōs !nâ mûmûsa i 2012ǁî kurib kōse, xaweb ge Namibiaba !hau!hausase ǀarosen ra !gôagu malarias khoraǂuisens di ǁîs xa ra !aromahese ra hâ ǁōn !nâ 2014ǁî kuriba xu 2017ǁî kurib kōse ge !hara.
Nēs ge Ministeris ǂUrusib tsî ǀHûhâsi !Oabadi dis gaxu ǁaeb !aroma dīhe hâ ǀaweǁguib 2017/18ǁî kuriba xu 2021/22ǁî kurib kōse nî !khoeb !nâ !gāsase ra ǂoaxa. Malarias ǀkha !gaeǁaresa ūhâ ǀaen ge 2016ǁî kurib di 24 869sa xu 66 141 kōse 2017ǁî kurib ǁga ge ǂharo tsî malarias xa ge ǁō khoen di !gôaba 93 !nae!khaidi 2016ǁî kurib dide xu ge ǁgôaxa 92 !nae!khaidi kōse 2017ǁî kurib !nâ. ǀGapi !gôab di malaria !nae!khaidi ge khoraǂisens nē ǁōs dis hîa Kavangob di ǀgam ǀkharikha !nâ ge a hâs xa ge !aromahe. Malariasa ra !aroma ǀûintsina ǁkhaubas ase ra ǁkhaubas soǀôab ǀkha ǀiri!nâhe omdi di !gôab ge 2016ǁî kurib ai di ge 659 830 īsa xu 2017ǁî kurib !nâ 694 328 kōse ge ǂharo. !Hū!nāsise a ǀirisa hâ!khain ge 80.3 persentgu ai mâ. Ministeris ǂUrusib tsî ǀHûhâsi !Oabadi dis ge 15 000 ǀûidi, ǀgaisa gaxuse hâs ǁkhāsiba ūhâ tsî malariasa ǁkhaubas !aroma hâde Hoa !Hūbaisi ǁAedi ǀGôaron ǂGaes (United Nations Children’s Fund- UNICEF) di !hū!nāsi beros xa ge māhe tsî nē ǀûide ǁnā !garo!ā !âgu hîa kaise !nū tsî sīhesa hoaǁae īǁkhā kai tamagu ǁga ge sîǂui. Shangalab ge ǀnî soa-i !nâ HIV/AIDs tsîna tsâǀkhā tsî ge mî, kurigu !oedes nē ministerisa antiretroviral soǀôana HIV positif khoena ra māsa.