LIBANGOKI ze silezi, ze kulubelwa kuli li simuluha mwanaha Zimbabwe neli swelwi sunda ye felile kasamulaho wa kuuzwa mashilin`i mwapanga ya Standard Bank mwatolopo ya Gobabis ka kuitusisa litobolo mwalihola za kakusasana. Ba ketalizoho kubona neba swelwi mwanaha Botswana. Haisi a li mun`wi kubona ki yana kilwe a swalelwa mwanaha mo mi na kilwe a zibahazwa ka kuba mutompehi Oscar Mlule kasamulaho feela kezo ya busholi yeo inge a kwaeza simbayambaya sene si swanelwa kuitusiswa mwakutula museto. Simbayambaya kisa mubala o musweu mi si zibahala ka Nissan Navara. Ba ban`wi bene ba swelwi neba zibahalisizwe ka Mthulisi (Happy) Sibanda, Matole (Themba) Nasiosus, Plan (Klowane) Ndebele ni muzamaisi wa sikwata Moyo Sikhumbuzo. Libizo la yo mun`wi ya akalezwa neli sika fiwa kakuli hakuna hande bupaki-tuna bwa kuli neli yo mun`wi wa bona baba akalezwa ba kaufeeela. Hana kile a tamiwa mwatolongo, Mlule na kile a patalaza kaza ko balikani ba hae neba kona kufumanwa ten`i ili nto yene tisize kuli mane mwalizazi leli n`wi la ka busa mwalihola feela za kakusasa kuswaliwe banee bao mwanaha yani ka kuzamaya feela libima ze mashumi a malalu mwanaha Botswana ka kupo ya ketelezo ya naha yani. Mlule na kile a taluseza mapokola kuli na kile a matisa simbayambaya ni kusiya balikani ba hae mwabuse bwa naha yani kakuli yena nata ba ni bona mwamazazi a sikai feela. Sapili neku kulubelwa feela kuli neli batu ba lalu feela bene bali mwasimpangaliko kamukana seo. Kakuya ka mufumahali Sila Bezuidenhout mun`a kampani ya Sila Security Services, babeli kubona baba akalezwa neba kile ba swala malonda babeli bene fa yemi fande ya panga haa balalu bona neba kile ba matela mwahali ni kukena mwapanga. Ba lalu bene ba kile ba kena mwapanga neba kile a huweleza man`I ni man`I yana inzi mwapanga ka buhali kuli ba lobale fafasi ni kuolela pene ye likana N$195 000 yene li mwalikwama ze shelana za panga. Maofisa ba kopani ba naha ye ni naha yani ba palo ye mashumi a mabeli sihulu ba kampani ya Sila Security Services ki bene ba kile ba lelekisa libangoki zeo ni kuli swala. Limotikala ze supile kubeya polopela I lin`wi ki zene kilwe za itusiswa mwamuseco kaufeela. “Museco mwanaha Botswana no kile wanga nako ye telele kakuli kuna ni libumbu maswe mwanaha yani,” ne kubulezi Bezuidenhout. Mufumahali Bezuidenhout na kile a ekeza kuli libangoki neli zamaya mwalibumbu kwatuko ni mikwakwa ya naha. Mlule na swelwi ni pene ye likana N$2 000 yana swanela kuitusisa kwateko ya mafula a oli a simbayambaya se sina ni masiti a mabeli. Ba lalu baban`wi neba fumanwi ni pene ye likana N$35 000, N$40 000 ni N$46 000. Detective Inspector wa sikiliti sa Omaheke, Rudolph Isaak na kile a taluseza ba mutende wa New Era kuli ba ketalizoho kaufeela bao bene ba kilwe ba swalelwa mwanaha Botswana bata tiswa mwanaha mo ni kuzwekisezwa bufosi bwa bona mwamazazi a cwale a. “Luta kupa feela ba naha Botswana kuli balu tambeke libangoki zani,” ne kubulezi Isaak. Ku akalezwa kuli libangoki ze silezi zeo, li kona kuba zona hape zene kile za uzwa mashilin`I a panga ye swana mwalitolopo ya bo Okahandja, Windhoek ni Gobabis mwalikweli ze peli ye felile. Lipatisiso lisa zwelapili sina hali sika nitifaza kale kaza akalezo ye.