WALVIS BAY – Bao ba akalezwa kuba malengwami babalalu ba neba tinile sina mapokola ba akelelizwe kuli neba uzwize mali a likana mashumi amane a madolasi (N$40 000) mwa sintolo sa Nandos sesili mwa Walvis Bay la Sunda.
Kualabela kwa taba ya busholi yeo, Chief Inspector, John Mwatongwe kuzwelela kwa sipokola sa Walvis Bay u ize, taba yeo i ezahalile mwa nako ya kakusasana kwa ma 09H00 nakonyana pili sintolo sa Nandosi sisika kwalula kale minyako ya litekiso za sona.
Sintolo sa lico za putako, sifumaneha mukulela wa mukwakwa opatehile ahulu wa Sam Nujoma Avenue, buse bwa Spar Supermarket. Mwatongwe u bulelezi ba mutai wa New Era la Mubulo kuli sitangu seo siezahezi nako yeo Muzamaisi wa Nandos ni yomumwi kwa babeleki a nebasasweli kuitukiseza kukwalula pisinisi.
Bao ba akalezwa neba fufezi mwa litino za sipokola, mi ku akalezwa kuli se ba ngongotela yo muhulu ni kusupeza sisupo sa kuli a kwalule munyako.
“Mwa kukena feela yomumwi kubaba akalezwa a chomola tobolo (pistol) ya hae ni kufa taelo ya kuzwisa mashelenyi mwa sibulukelo sa mali (safe). Yo muhulu wa sintolo a zwisa N$40 000 mwa sibulukelo ni kutambeka malengwami mi hape ba mutama mawenge kwa mazoho,” kwa talusa Mwatongwe.
Kakuya kayena, bao ba akalezwa bashimbile mafoni a amabeli ni kushimba mali a likana mianda ye supile ka mwanda ulimumwi wa madolasi (N$ 800) kuzwelela ku yomuhulu wa sintolo pili ba sika baleha kale.
Yo muhulu wa sintolo na likile ku lemusa ba sikwata sa silelezo sa G4 bao bakonile kutomutamulula mawenge ni ku lemusa mapokola.
Mwatongwe u ize, akuna ya sa tamilwe mwa kezo yeo mi lipatisiso lizwelapili.
“Lu patehile kuulunguta buniti kaufela nihaike akuna buniti hande bobu namalalile. Ki kalibaka mani ababeya mali a maňata cwalo mwa sibulukelo, ki taba yesa utwahali hande.
“Sina ka pisinisi neba swanela kuba ni sibeyelo sa mali sa kwa mukunda ko kuzamaisa fela ba nkanteli ba silelezo.
“Ki kozi yetuna kuba ni mali akuma sina foo,”a talusa.
Kakuya ka Mwatongwe a kusika utwahala kale hande kamo bao ba akalezwa neba konile kubaleha kuzwa fa kezo yeo.
Yomumwi kwa babeleki ya nainzi fande nako ya kezahalo yeo, a kuna motikala ya konile kubona kuli mwendi basebelisize kushosholoka ka yona.