Mambo gokuhova gana siki kono murongone nanta-ntatu (48) govarwi vanare tava gatungu. Presidente Hifikepunye Pohamba kauyungire asi epangero kunakusikisamo yitumbukira yoVarwi vanare va(PLAN). Mvhura ezi kazipwire vatulirepo mbunga zikarerepo yihepwa yoVarwi vanare mosirongo esi, azo kwatamekere kutura yigongi nokulikida runyegenyo rwazo, Awo kwatente asi maruha gonomfi, nomina, nonofarama, ntani yimaliva yiso sininke varwanenene mokugusa sirongo moupika.Mombapira zawo zorunyegenyo kwatjengemo asi Epangero ngano likare nosinka komaudigu gawo.Kutwara momukurona go sirongo Presidente Pohamba katente asi Epangero alyo lyatokora kupurakena udigu wawo ngwendi wo kuvatungira mambo.Age kagwedereko asi pogeli matokoro gamwe lyagusa Epangero ngwendi Projeka vatulisapo zonomfi omu ngava gwanena Varwi vanare yiwizamo yawo, ntani hena Nongombe dokusika keyovi nomasere gatatu nonomurongo ntambali nantano (1 375) domulyo gokusika ko milliona zimwe edi vageve kovarwi vanare wokusika kesere nonomurongo mbali nantano (125) momvhura 1996.Komitiye ezi kwahere hena asi ngano Vana vavo vagwane tupu elirongo nouhaku womawokowoko. Kutwara mehundiro lyawo asi ava vana kurugana vavapulisire kurugana dogoro konomvhura nomurongo ntambali (70).Kugusako oyo neyi yekwato nomfi ngano nkenye gumwe tagwana hena mayovi nta-ntatu gono dollar daNamibia (n$8 000) mwa nkenye kwedi.Mbunga ezi kwatulirepo hena siturwapo asi ngano vavafute hena nomvhura edi vakakere ponze nkenye gumwe ngano agwane nodollar daNamibia dokusika komayovi nomurongo ntatu neyovilimwe (n$31 000). Ano eyi linakurugana po epangero yokuvakutungira mambo gokusika konomurongo ne, nanta-ntatu (48) aga vana kundindira kukagamanesa ngesi kouhura wokwedi kooku, ngwendi momu zayidivisire kabinete.Pohamba momapeu ga geve nonsapi dembo paveta ko mukurona gwawo Matiasa Mbulunganga Ndakolo gopomukunda gwa Iilogati momukunda horowero gwa Ohangwena. Age yige gumwe gokuhova kugwanena mo uwa moprojeka ezi.Matungo gomambo aga ntani nayimwe ngoso kwaku likida elizambero lyoVantu vetu omu vakalizamberere moyita varwire sirongo esi. Kagwedereko hena asi epangero nali twikira kuvatera nkenye gumwe gomvarerwa zaNamibia adjobwane emanguruko nekuliko lyosirongo esi. Kutwara mehundiro datulirepo nonkwati danare da Robben Island awo hena varwi vanare va PLAN momvhura zomayovi gavali nantatu(2003) mokakomitiye koruha roUminisiteli zontambo mukunda nomambo kumwe nekuliko lyo komambo kwadingwire nomukunda horowero nadinye murongo nantatu (13) mokwedi kwansinano mvhura zina,omu vagwanekerere novarwi vanare vonomvhura dokusika konomurongo ntazimwe nokukandwisa vatare asi vangapi vakara. Komitiye zepuragero ezi kwagwene Vantu esere nonomurongo mugoyi nagumwe (191) varwi vanare woyita, ntani nomurongo mbali navatatu (23) nonkwati danare da Robben Island, ano esere navatano (105) na vava varemanene moyita yekondyero manguruko. Ano moyitundwamo yawo opo vaya yigeve yiyo yaninkisire kabinete zika pulisire yimaliva yoku sika kono milliona ntano sikomona ntantatu donodollar daNamibia (1,8million n$) mwa (June) momvhura mayovi gavali nantazimwe (2006) vatungiseko mambo nomurongone nanta-ntatu (48) Ano milliona zimwe sikomona ntano (1,5million) azo kwaziruganesa korutyeno rokurugana kezuva ntani nomema yipo asi vagwenenimo uwa kapisi vakakare noudigu wo rutyeno ndi mema. Epangero hena lyatulira ntere nomilliona mbali dono dollar dana Namibia (2 million n$) mwa nkenye mvhura moUminisiteli wepangero lyo pontambo mukunda nomambo nekuliko lyokomambo mokukayiruganesa kwa nkenye eyi. (NHE) yizo zali pyakidira moprojeka ezi.Azo nazo zalizambera mokutwara mawokowoko yiruganeso nayinye eyi nokukeverera matungo asi tava ga tungu nawa.Yiyo vali zambera hena moku turamo ngwendi yikopa mokombisa ntani norutyeno, nomema momatungo aga. Presidente Pohamba kava tanterere asi Epangero lina musikisiremo yihepwa yeni, nye kava korangedere mokufira mbili mambo aga. Mwaha tarera Vantu vakazonagure emona lyeni kareni tomu gazereke mambo aga yipo gakare moukaro una wapere.