Nonando kape na uuyelele wothaatha, kutya oopolota dhoonomola 493, 494 oshowo 131 taku ti odha mayola gwondoolopa yaNdangwa Paavo Amwele, aakalimo yomolukanda moka oya ti osho yu uvite tashi popiwa.
Oshifokundaneki shika sho kwali shayi kolukanda hoka Onantsi, okwali sha ulikilwa kaakalimo kutya omahala ngoka taku popiwa kutya oga mayola Amweele.
Oshilyo shokakomitiye molukanda Onantsi Sackaria Shiyela okwa ti, nayo oyu uvu kutya ehala ndyoka olya mayola gondoolopa, ihe ke na uumbangi musho, ihe osho tashi popiwa.
Aanilonga yEhangano tali ithanwa James and Young, ndyoka hali opaleke oopate, ohaya zi pomahala ngoka 493 odhowo 494 geli kumwe.
Omukuluntu wiliki gwehangano ndyoka Clemens Ndinoshinge, okwati mehala moka oyeli mo ashike pakathimbo ihe ihaya futu sha.
“Otwa li twa ningi omayindilo kelelo lyondoolopa kutya otwa hala ehala lyoku hiila, ethimbo lyoomwendhi 36, ndhoka ta tu longele mondoololopa yaNdangwa, no kwali twa pewa ehala ndika,” ta fatulula ngaaka.
Ta ti, nonando shoka okwali yeshi ningi pamushangwa, sigo onena inaya ya mukulwa kutya, mehala moka otaya kala mo ngiini.
“Otwa lombwelwa kwa ngoka etu tula pehala mpaka kutya, ndika ehala lyelelo lyondoolopa, ehala lya nuninwa omatala, ihe otuuvite omapopyo sho twa kala mpaka okuza moshigwana kutya, otuli mehala lyaMayola gwondoolopa,” ta ti ngaaka.
Ndinoshinge okwa ti ngele otashi shiwa, oyena ohokwe yoku landapo ehala ndyoka.
Omulumentu gumwe ngoka inaahala okupopya endhina lye, gomolukanda moka okwati, naye okuuvu tashi ndhomotolwa kutya, ehala ndyoka olya Mayola Amweele.
Kaine Shikongo ngoka gumwe gomwaamboka ya tidhwa anuwa sho ya landitha omavi kaashili paveta, okwa ti natango kena uuyelele kutya miilonga okwa tidhilwa mo shike, pakathimbo.
“Oomwendhi ndatu paife ndili pevi, omanga anuwa omakonakono geli metifa. Ngame shoka taya fekelendje nasho, inandi shininga, otaya lundilendje,” ta popi ngaaka.
Aanilonga yelelo lyondoolopa yaNdangwa yomandhina Antonius Donatius, Lukas Kristian oshowo Shikongo, oya li ya tindhwa oomwendhi ndatu dha piti, sho taya fekelwa ya landitha oopolota kolukanda Onatsi, kaashili paveta.
Mayola okwa popi ta ti, mboka ya tidhwa miilonga pakathimbo omolwa ya landitha oopolota kolukanda Onatsi mOndangwa, oya hala okukwata endhina lyandje noongilishi.
Ndhoka okwali endhi popi, sho kwali a pulwa koshifokundaneki shika kombinga yoopolota ndhoka 493, 494 oshowo 131, ndhili kolukanda kwa tembundhilwa aakalimo yena iiyemo iishona.
“Ndhoka kandhishi dho shili, kandina oopolota kolukanda Onatsi, kandina esiku ndika ninge eyindilo lyoopolota komahala ga nuninwa aantu yena iiyemo iishona,” ta fatulula ngaaka.
Mayola ta ti, kena shoka ta longitha omahala ngoka, mboka ya yono naya pangulilwe ashike omayono gawo, ihe inaya kwata endhina lye lyongilishi.
Omupopiliko gwelelelo lyondoolopa Petrina Shitalangaho okwati, oopolota ndhoka tandhi popiwa 494 oshowo 493 ondhina aantu yalwe, ya yooloka, no ndhili komandhina gawo.
“Otuli metifa okunyangadhala oombaapila kutya omahala ngoka ogeli komandhina goolye opo tu yeleke shoka tashi popiwa,” ta ti ngaaka.
vkaapanda@nepc.com.na