Omukwatelikomeho gosipana Eeshoke ChulaChula, Jackson Da Silver okwa ti aadhani yaali mboka opo ya zi miipakete, oya gwedha ko kesindano sho ya dhenge Tigers ookola mbali munola.
Uudhano mboka owa dhanenwa mokapale kemanguluko mOshakati Olyomakaya.
Da silver okwa ti oya mono aadhani yomadhina Eric Yama, omuCongo a zi koNkama FC koZambia Premiership osho wo Edwin Chipile a zi ko Zambia.
“Otwa kala nale twa hala okumona iitsa mbyoka itatu, opo tu thike ponkatu mpoka tu li nena. Aadhani oya dhana neyitulemo lela osho wo nelalakano lyokusindana,” ta popi ngaaka.
Ta gwedha ko kutya, ehafo olya nyenga nambishi e li megumbo mwa tselwa, onkene oya nyanyukwa sho ya sindana.
Da silver okwa ti, elalakano lyosipana kehe okusindana.
Chula-Chula ohela natango okwa dhana nosipana Young African okuza koGobabis, nethimbo oshifokundaneki shika sha ka nyanyangidhwa, uudhano mboka kakwa li wa tameka.