WINDHOEK
Presidente Hifikepunye Pohamba moutano kaupwire kakatundire kosirongo saTanzania oku kakakere pepongo lyomazuva gavali lyomunkama lyoyirongo14 monkondwa ezi.Apa tupu kaya sikire pokapare kaEros konodira age yiyo katanterere New Era asi mokukwama upolitika ou una kara mosirongo saZimbabwe vapresidente woyirongo yokombindakano zaAfrika,kava pere presidente gwaSuid Afrika Thabo Mbeki asi akare mpitikatji pokatji kapresidente Robert Mugabe nonombunga mpatanesi unenepo mpitisili gombunga MDC ogu vana kutumbura asi Morgan Tsvangirai.
Pohamba kayinkondopekere asi age kuna kumona asi Mbeki yige muntu gouhunga mokukohonona udigu ou ndi atulisepo mpito asi Mugabe naTsvangirai vauyunge, yitundwamo yangesi kuna kuyindindira vakayigave koTroika.Pohamba kapi kageve asi siruwo musinke vana kundindira yitundwamo eyi.Mugabe katambwire asi Mbeki kuvhura tupu akare mpita katji mokukwateramo mbunga ezi zaSADC pokatji kepangero lyaZimbabwe nombunga mpatanesi.Ame kapi nani tanta asi siruwoke ngaka gava yitundwamo eyi koTroika,yimo ana kutanta presidente Pohamba.Namibia sirongo esi sakara asi silyo saTroika zina kara mounasipundi sapresidente gwaTanzania Jakaye Kikwete kavakwatesereko egano eli lyoku rugana sirugana sangesi.Zimbabwe,Lesotho naDemocratic Republic of Congo kava kere tava pitisire elikwamo lyosigongi esi.
Ntumwaraka zawo ezi kava geve pokumana tupu epongo eli kamukere asi,epongo eli lyokugwedererako mokugusako asi kava pere Mbeki akare mpitakatji,vakurona womapangero kavatente asi eyi kuvhura vature asi sirongo saBritaniye saharetamo hena ukoloni moZimbabwe.Nompitisili edi daSADC kava kere nosinka omu sirongo saZimbabwe sina kuparuka paekonomi,yipo nye kava tokwere asi hamutjanga gendesi gombunga ezi zaSADC Tomaz Augusto Salomao gahepa kudingura sirongo esi saZimbabwe yipo aya gave asi ngano ngapi mbunga ezi zaSADC nazivhura kuvatera sirongo esi paekonomi.Ekonomi lyomoZimbabwe kuna kulitjangwilira asi kapi lina wapa unene eparu lyovantu mokugwana nondja nayimwe ngoso yokuvhura kulivatera nayo.Ntani epongo eli kavahundilire vautokero asi vagusepo esanyaukiro eli vagava kwaZimbabwe kumwe nampitisili gwawo ntani epangero lyaBritaniye lyahepa kusikisamo etumbwidiro lyalyo asi tava vatere sirongo esi kelikwamo lyaso lyevhu.
Awo kavarugwilire etokoro lyawo asi sirongo saBritaniye sisikisemo etumbwidiro lyaso eli vakageve apa vakakere mepongo lyomoLancaster House ntumwa raka zelipakerero yimozina kutanta.Ano moLesotho awo kava tokwere asi vahepa kutumako mbunga zovaministera yipo vakatare asi mukaro ngapi guna kara.Eyi kayikweme yitundwamo eyi kageve nkuru ministera gwaLesotho Pakalitha Mosilili ntani yitundwamo yahamutjanga gendesi gombunga SADC zomosigongi esi vakere naso vaministera moTroika mokuhorowora ndi mahoroworo aga gakere mosirongo oso vana kutumbura asi Kingdom of Lesotho.Ano moDRC,Epongo eli kalitokwere asi vahepa kurugana ko unene yipo yimoneke asi mahoroworo kwagendapo nawo.
Ntani yiyo kava tokwere hena asi matokoro gahepa kuwizapo asi mosirongo sina muwize mpora.Awo kava geve sinka sawo asi vantu kuna kufa mosirongo sina yipo asi vatungimo vahepa kulifumadeka ngovantu nomaparu gawo yimo zina kutanta ntumwa raka ezi.Ntani awo kava yinkondopekere asi sirongo esi zaDRC sikare nepangero salyene vahepa kukara novakwayita vavene,navenye ava vana kara nomauta gomundiro vahepa kugagava kovakwayita wosirongo,yipo asi nkohwa nkohwi nampo nazipwamo.