OMANDONGO – Omupresidente Nangolo Mbumba okwa kumaida oshiwana opo shi ke lishangife oukalata vokukufa ombinga momahoololo oo e li ko neudo.

Okwa ti osha fimana opo Omunamibia keshe a kale e na okakalata kokuhoololifa.

Edi Mbumba okwe di popya Koshivilotumo osho sha li ko Olomakaya komukunda Omandongo moshitukulwa shaShikoto.

Omupresidente Mbumba kwa li a waimina ovafita noilyo yongerki yaELCIN, oveleli vopamifyuululwakalo, ovaleli vopapolitika veendodo da yooloka kOshivilotumo oshi-154.

POmandongo opo pwa fikila ovatumwa Ovasuomi votete monooli.

Koshivilotumo okwa li ku na eengudulwiimbo da dja komaongalo a yooloka tadi imbi nokuhambelela.

Mbumba okwa ti Etumo ola fimana mondjokonona yongerki yaELCIN notali twikile okudana onghandangala yakula okuyandja ehongo lopaukriste.

Omupresidente okwa ti pefimbo lomahoololo oo e li ko neudo muNovomba omunhu keshe oku na oufemba woku ka hoolola omuleli waye noshoyo oilyo yomutumba weumbo lopashiwana.

“Osha fimana ngeenge omunhu ta kufa ombinga okuhoolola molwaashi omunhu ota longifa oufemba waye mwene,” ta ti.

Mbumba okwa ti ovanhu nava longife omhito ei yokulishangifa oukalata wokuhoololifa shaashi omunhu ehe na okakalata komahoololo ita ka pitikwa oku ka hoolola.

Okwa kumaida oshiwana opo shi liufe komilandu odo da tulwa po pefimbo taku kala omahoololo.

Omupresidente okwa kumaida yoo vali ookansela koikandjohoololo ya yooloka opo va kwashilipaleke kutya oikulya yoshikukuta otai topolelwa ovanhu ve li momhumbwe yoipalwifwa.

“Oikulya nai topolwe pauyuuki pehe na omunhu ta ningwa okatongo,” ta ti.

-fhamalwa@nepc.com.na