Omupresidente Nangolo Mbumba okwa ti ombili nelongelokumwe oyo oluuli lwonkalomwenyo ombwaanawa.
Mbumba okwa popi ngaaka esiku a kutha osheendo showina, sho a talele po Ohamba yaUkwanyama Martha Mwadinomho yaKristian Nelumbu mOmandaaha kOmhedi. “Onde ya ndi ku pandule kahewa kandje, sho wa pewa epapa lyoye lyuundohotola, omolwiilonga wa longo nohole wu na noshigwana shoye,” Mbumba ta popi ngaaka.
Te mu tanga ta ti, Ohamba omuleli omwaanawa, omuleli gwaantu ayehe, aakuluntu naanona, iha tongola aantu.
Omupresidente okwa ti, Ohamba oya kala nokulonga nuudhiginini opo aantu ye ya kale ye na iikulya, nuunene ya kale ye na ombili.
“Meekulu okwa kongolola nokutekula oohanona inaadhi halika kooyina, aakuluntu yaa na omalukalwa mboka yamwe yomuyo ngashiingeyi ye na nale omalukalwa gawo. Shoka a ningi ihashi ningwa kukehe onkene oku na okupandulwa,’’ ta popi ngaaka.
Mbumba okwa indile wo oshigwana shi simaneke Ohamba poompito adhihe naaluhe shi kale tashi pula omayele kuye uuna ye ga pumbwa taya pitile momilando dha tulwa po.
Omupresidente okwa halele Ohamba omayambeko omanene nomwenyo omule kombanda yevi.
Ohamba oya ti, Mbumba okuume ke, nota pandula sho a kutha ethimbo a thike puye noku mu pandula.
“Otandi popi we shike? Ngele otandi ti onda pandula, tangi tangi,” ta pandula ngaaka.
-vkaapanda@nepc.com.na