Presidente Nangolo Mbumba kayasikire moNamibia kukatunda ko New York, United State momapeu, omo kakalihameserere mo mepongo lyaUnited Nations General Assembly (UNGA) lyou79th. Epongo eli lyo 79th lyaUNGA kalikereko kutunda mo 19 dogoro mo 26 Sitarara 2024 nositumbura sina kara asi ‘ Kwato kusiga ko gumwe konyima: omu naturuganena kumwe tuze komeho nompora, ekuliko omu natutura untu womuntu pwantani nokomuhoko ogo gokomeho.
Posiruwo nye oso age koUNGA, Mbumba kakakere tagendesa epongo eli kumwe nakansela gosirongo somalipakerero saGermany Olaf Scholz kutunda mo 20-23 Sitarara 2024, ezi nye kazikere nositumbura asi epongo lyokuza komeho: omu muna hamene nye ewapukururo lyomungura, omu navawapukurura meho.
Mbudi kazitundire kwaPresidente momapeu, kuna kara asi age Mbumba komeho aka ze mepongo age kakamwene hamutjanga ntoni gombunga zouzuni Antonio Guterres mo 19 Sitarara 2024.
Gutteres kahefe unene mokumona Mbumba ntani age Mbumba omu ana reta uzuni kumwe morwa nage gumwe ogu ana kara asi ana kambekeko kuwoko mokureta nompitisili vayaliyonge kuhamena ezo komeho lyouzuni. President Mbumba katente mulyo gokukara asi pantambo zouzuni pakare elikwamo omu vana kuvatera yirongo eyi yina kukura vagwanenemo mauwa. Mbumba ntani H.E Gutteres simpe kavaliyongere omu Namibia omu ana lituramo mokureta mpora moyirongo yaSADC, yimo ngoso zina kuhagara mbudi zendi.
Mbumba posiruwo sendi sokukadingura age moyirugana kepongo eli lyou 79th lyoGeneral Assembly kakamwene hena Presidente gepongo eli Philemon Yang, Scholz, president gwaMauritius Prithvirajsingh Roopun, ntani presidente Joao Manuel Goncalves Louranco gosirongo saAngola.
Posiruwo nye sepongo lyo 40th annual awards Gala of the America Institute (AAI) awo nawo kwakere nye nosilika sokudiworoka nakufa Presidente Hage Geingob, Mbumba katente asi AAI, kavakere tavafumadeke mudinkantu ogu gakereko monomvhura dina domo 1960, omu evango eli lyatunga nye vantu vakare tavakapitisira komeho oko. President gosirongo simpe kageve ruhawo rwendi kukwateramo vaNamibia navenye omu vana kudiworoka muntu ogu gakere mpitisili gomutaro ntani kugava sihonena meparu lyendi.
President Mokgweetesi Masisi gosirongo saBotswana, presidente Nana Akufo-Addo gosirongo saGhana, Presidente Joseph Nyumah Boakai gosirongo saLiberia, mukarelipo Linda Thomas -Greenfield, gakarerapo sirongo saAmerica moUSA moUN, ntani mukada gwanare gwaPresidente gwaNamibia Monica Geingos, yiwo nawo kavakere posilika sangesi. –Nampa.