!Hūb di ǁûb, Nangolo Mbumbab ge ǂoa ge wekheb di Fraitaxtsēs ai Chinab ǁga ge ǁkhana, 9ǁî ǂNûs, China-Afrikab !Hû-ǁares disab nî sī ǁhao!nâse. 

ǂNûs xōkhāb ge Mbumbaba khoexa!nâ sarisa Chinab !Hūb di ǁûb Xi Jinpingib ǀkha nî ūhâ. 

“Namibiab di ǁ-haos nē ǂnûs !nâs ge ǀnai !gâi!gâna ge -ǁgau, aiǁgauseb ge Namibiaba ǂkhâ!nâsa !kharaga omkhâisens projekn hîa daogu, skolgu tsî ǂansa mā!kharu tsî ǁāǁās ǁkhāǁkhākhâidi tsîna !khōǂgā hân !nâ-ū, ǀnîn nausa noxopa hâse,” ti-i ge !hūb di -ǁûb berosa xu gere mîhe. 

Nē ǂnûs ge 4-6 Taraǁkhumuǁkhâb dis kōse nî hâ. ǂNûs nēs ge a ǂhanuǁî ǂnû hîa Chinab tsî !nāsa Afrikab !hūgu, tsî ǁkhāti Afrikab ǀHûsa xu a !amǁaresasa. 

Nauhâ !ēdi xōkhās ge nē ǂnûsa Chinese ǂnûiǂgāde !kharaga !âgu !nâ ǁguiris īǁkhāsiga ra mā. Namibiab di !Hūǂnû-ǁkhaeba-aob Chinab !nâb, George Elia Kaiyamob ge New Eraba ge mîba, Namibiab buruxase nēti ī ǂnûde ǁhao!nâsa xu ra domdere !khaisa. “Namibiab di ǂharugub ge !gôab studentn hîa Chinab !nâ ra ǁkhāǁkhāsenn, aiǁgause main ǂharugub !nân sîsenǁareba ge ūkhâi,  î da !hūǁaresa sîsenga ǂnuwi tsî !gâi !goaxa ǁaeba sada khoen !aroma ǁawoǁawo,” tib ge Kaiyamoba ge mî. 

!Hūb ǀAweǁguib !Nans di direkter xenerali, Obeth Kandjozeb ge New Eraba ǂoa ge wekheb di Donertaxtsēs ai ge mîba, Namibiab nē ǀō-aisa ǂnûsa xu hoaǀkhākha xu hâ sîsenǁareba xu ra domdore !khaisa. 

Ai!âb ge Kandjozeba a mîs ge, Namibiab nē ǂnûs !nâ ge 2021ǁî kurib !nâ a ūhe mîǁguigu di projekdi, Hosea Kutako Hoa !Hūbaisi Anukuniǂgās (HKIA) ǁga garu ǀasa daob kuruhes di ǀgamǁî !harosa (2B) !khōǂgā hâse, a !gâi!gâba ǀamasa. 

Ai!âb ǁîba gere mîs ge, aoǁguisa projekdi hîa Chinab tsî Namibiab hâkha ǁaegu ǁgam-ǁaredi !nâ Namibiab di domdores kōse hâdi ge, ǀawa!namn di 1500 omde ǀAeǁgams !nâ ǂnuwisa !khōǂgā hâ.